Áskerı ushqyshtar oqý-jattyǵý ushýlaryn dańqty qolbasshy Baýyrjan Momyshulyna arnady
ASTANA. KAZINFORM — Qazaqstan Respýblıkasy Qarýly kúshteriniń áskerı avıatsııalyq bazalarynda qazaq halqynyń uly perzenti, Keńes Odaǵynyń Batyry Baýyrjan Momyshulynyń týǵanyna 115 jyl tolýyna oraı aýqymdy oqý-jattyǵý ótti. Bul týraly Qorǵanys mınıstrligi málim etti.
Іs-sharanyń basty ereksheligi – Áýe qorǵanysy kúshteriniń áýe kemeleriniń Astana, Taraz, Balqash, Jetigen, Qaraǵandy, Shymkent, Taldyqorǵan jáne Aqtaý qalalaryndaǵy áskerı áýeaılaqtardan bir mezgilde kókke kóterilýi boldy. Ushýlarǵa S-295, Sý-30SM, Sý-27, L-39S ushaqtary, Mı-17, Mı-35, Mı-171 tikushaqtary, sondaı-aq ANKA ushqyshsyz ushý apparaty tartyldy.
Jeke quram dańqty qolbasshy Baýyrjan Momyshulynyń rýhyna bir mınýt únsizdikpen taǵzym etti. Batyrdyń 115 jyldyǵyna oraı ushýlardy basqarý pýnktinde Volokolamsk túbindegi shaıqasqa qatysqan jaýyngerdiń ómir joly men erlik isterine arnalǵan estelik burysh bezendirildi.
Ushýǵa deıingi nusqaýlyq barysynda ekıpaj múshelerine aqyl-keńes bergen komandırler bul is-sharanyń urpaqtar sabaqtastyǵyn nyǵaıtý jáne Otan qorǵaýshylardyń dańqty jaýyngerlik dástúrlerin jalǵastyrý turǵysynan mańyzyn atap ótti.
– Bul ushýlarǵa qatysý – árbir áskerı ushqysh úshin úlken mártebe ári zor jaýapkershilik. Oqý-jattyǵý sabaqtaryn Baýyrjan Momyshulynyń esimimen baılanystyra otyryp, biz onyń Otan aldyndaǵy eńbegine tereń qurmetimizdi bildirdik. Onyń ómirlik qaǵıdalary men adamgershilik ósıetteri áskerı qyzmetshiler úshin rýhanı baǵdar men moraldyq tirek bolyp tabylady, – dedi Áskerı-áýe kúshteri qolbasshysynyń orynbasary polkovnık Medet Ásketaev.
Oqý-jattyǵý ushýlary shtattyq rejımde ótip, qoıylǵan barlyq mindetter tolyq kólemde oryndaldy. Іs-shara Qazaqstannyń Áskerı-áýe kúshteriniń joǵary jaýyngerlik daıyndyǵyn jáne ushqyshtar men ınjenerlik-tehnıkalyq quramnyń kásibıligin aıqyn kórsetti.
Aıta keteıik, Astanada «El úshin týǵan erdiń izi» atty Baýyrjan Momyshulyna arnalǵan taǵylymdy kezdesý ótti.