Áskerı teńizshiler júzýshilermen birge halyqaralyq Armııa oıyndary baıqaýyna daıyndalýda (FOTO)

ASTANA. QazAqparat - Bıyl tamyz aıynda Kaspıı teńiziniń reseılik sý aılaǵynda ótetin halyqaralyq Armııa oıyndaryna QR QK Áskerı-teńiz kúshteri «Oral» korabliniń ekıpajy tyńǵylyqty daıyndyq jumystaryn júrgizýde.

QR Qorǵanys mınıstrligi baspasóz qyzmetiniń habarlaýynsha, «Oral» korabli áýede, teńizde jáne sý betinde qalqyp júretin mınalardy nysanaǵa alý boıynsha praktıkalyq atystardy oryndady. Ár tájirıbelik atý daıyndyǵy barysynda jeke quram óz mashyǵyn arttyryp, nátıjelerdi jaqsartady.

Korabl ekıpajy is-júzindegi nysana kózdeý men qatar teńiz bıatlony jarysynyń «Qutqarý daıarlyǵy» kezeńi úshin júzýshilerdi daıarlaýdy ótkizedi. Júzýshiler úrlemeli qutqarý bógetine deıin 50 metr júzip barady. Baıqaýdyń sharty boıynsha júzip jetken adam bógetti aýdaryp, márege deıin júzip ótýi tıis.

Esterińizge sala keteıik, halyqaralyq Armııa oıyndary-2016 aıasynda QR QK Áskerı-teńiz kúshteri «Kaspıı kýbogy - 2016» (teńiz bıatlony) teńiz konkýrsyna qatysady. Atalǵan bıatlonǵa qatysatyn negizgi jáne qosalqy korablder anyqtaldy.

Baıqaýǵa qatysatyn negizgi korabl «Oral» zymyrandy-artıllerııalyq korabli, al qosalqy - «Saryarqa» korabli. Bul ekıpajdardyń quramy 33 adam.

Ótken jyly QR QK ÁTK komandasy «Kaspıı kýbogy» baıqaýyna birinshi ret qatysty. Atalǵan baıqaýdyń qorytyndysy boıynsha bizdiń komanda ekinshi orynǵa, sondaı-aq kúmis alqa men «BL-680» jyldam júzetin qaıyqqa ıe boldy.