Áskerı teńizshiler Kaspıı teńizine jıynǵa shyǵady

NUR-SULTAN. QazAqparat - Quramynda Áskerı-teńiz kúshteriniń «Oral», «Saryarqa», «Mańǵystaý» zymyrandy-artıllerııalyq korablderi, «Alataý» mına-traldyq korabli jáne «Jaıyq» gıdrografııalyq kemesi bar top Kaspıı teńiziniń Qazaqstan sektoryndaǵy akvatorııasynda jıyn-joryqqa shyǵady.

Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.

Jıyn-joryq 8 qazanǵa deıin jalǵasady. Osy ýaqyt ishinde áskerı teńizshiler áýede, teńizde jáne ózgermeli nysanaǵa oq atady, korablderdiń jaýyngerlik oqý-jattyǵýlaryn ótkizedi, tar sý aılaǵynda, jaǵalaý mańynda jáne kúrdeli gıdrometeorologııalyq jaǵdaıda júzý jumystaryn pysyqtaıdy.

Budan ózge, kemeler top quramynda birlesken manevr jasaıdy. Áskerı teńizshiler vahtany júrip bara jatyp aýystyrýdy uıymdastyrady, dabyl quralyn paıdalana otyryp aqparat berýdi júzege asyrady, sondaı-aq korabldiń ómirsheńdigi úshin kúres pen apatty jaǵdaıdaǵy kemeni tastap shyǵý jónindegi normatıvterdi pysyqtaıdy.

Osyndaı jıyn-joryqtar keme ekıpajdarynyń praktıkalyq daǵdylaryn jetildirýge, Áskerı-teńiz kúshteri júzý quramynyń áskerı-teńiz mashyq deńgeıin arttyrýǵa múmkindik beredi.