Áskerı-tehnıkalyq mektep túlekteri ekonomıkanyń naqty sektorynda eńbek ete alady
Bilim berý mekemesiniń aýmaǵynda ótken saltanatty rásimge túlekterdiń ata-analary, Qarýly kúshterdiń ardagerleri qatysyp, quttyqtaý sóz sóıledi.
«Bizge bilim bergen Áskerı-tehnıkalyq mekteptiń oqytýshylar quramyna kásibıligi men shydamdylyǵy úshin zor alǵysymdy bildirgim keledi. Bul jerden úırengenim kóp. Bolashaqta óz taǵdyrymdy áskerı qyzmetpen baılanystyrýdy josparlap otyrmyn», - deıdi áskerı-tehnıkalyq mektepti bitirýshi Sultanmurat Ǵasyr.
Saltanatty ant berý rásimine qatysqan kýrsanttardyń týystary men jaqyndary úshin kontserttik baǵdarlama uıymdastyryldy. Qalyptasqan dástúr boıynsha Desanttyq-shabýyldaý áskerleriniń áskerı qyzmetshileri qoıan-qoltyq urys elementterin kórsetti.
Almaty bilim berý mekemesinde Áskerı-tehnıkalyq mekteptiń ózge fılıaldarymen salystyrǵanda áskerı mamandardy kóbirek daıyndaýǵa múmkindik bar. Jaqynda munda tyldyq jáne tehnıkalyq qamtamasyz etý beıini boıynsha oqytý baǵdarlamasy qabyldandy. Bul degenimiz – áskerı tehnıkaǵa qyzmet kórsetý men jóndeýge, dalalyq jaǵdaıda tamaqtandyrýdy, zattaı qamtamasyz etýdi jáne monsha-kir jýýdy uıymdastyrýǵa baılanysty 10-nan astam mamandyq.
Mektepke túsý kezinde balalar jas jaýynger kýrsynan ótedi. Onda olar taktıkalyq, fızıkalyq jáne atys daıyndyǵyna mashyqtanady. Avtomatty bólshekteý men jınaýǵa úırenip, áskerı tártiptiń negizderin ıgerip shyǵady.
Bıylǵy túlekterdiń arasynda «gaz-elektr dánekerleýshi» mamandyǵy boıynsha oqyǵan balalar bar. Olar ásker qatarynda ǵana emes, ekonomıkanyń naqty sektorynda da suranysqa ıe. Bul baǵdarlama Qazaqstan Prezıdentiniń jastardy jumyspen qamtý týraly tapsyrmasyn iske asyrý sheńberinde júzege asyrylyp otyr
«Bul – pılottyq joba. Qazirgi tańda bul mamandyq boıynsha 30 bala daıyndaldy. Jastardyń sertıfıkattary bar, endi olar áskerı bılet alady», - deıdi Áskerı-tehnıkalyq mektep Almaty fılıalynyń dırektory polkovnık Mıras Jylgeldın.
Jyl basynan beri bul jerde 652 jas oqyp shyqqanyn aıta ketý kerek.
