Qorǵanys mınıstrligi áskerı tehnıkaǵa qatysty aqparatty joqqa shyǵardy
ASTANA. KAZINFORM — Threads áleýmettik jelisinde Qazaqstannyń áskerı tehnıkasy halyqaralyq oqý-jattyǵýdan keıin elge qaıtarylmaǵany týraly jalǵan aqparat tarady. Qorǵanys mınıstrligi tehnıkanyń 6 qazanda áskerı bólimderge jetkizilgenin málimdedi.
— Ortalyq halyqaralyq áskerı oqý-jattyǵýlar aıaqtalǵannan keıin Qazaqstan Respýblıkasy Qarýly Kúshteriniń áskerı tehnıkasy turaqty ornalasý oryndaryna qaıtarylmaǵany týraly jalǵan aqparat taralǵanyn anyqtady. Bul aqparat shyndyqqa sáıkes kelmeıdi.
Qazaqstan Respýblıkasy Qorǵanys mınıstrliginiń málimetinshe, oqý-jattyǵýlar aıaqtalǵan keıin áskerı tehnıka 2026 jylǵy 6 qazanda turaqty ornalasý oryndaryna qaıtarylǵan, — delingen Prezıdent janyndaǵy Ortalyq kommýnıkatsııalar qyzmetiniń Jalǵan aqparatqa qarsy is-qımyl ortalyǵy taratqan habarlamada.
Ortalyqtyń málimetinshe, áleýmettik jelidegi jazba avtory jalǵan aqparatpen birge «Muny shet memleketke áskerı kómek kórsetý nemese Otanǵa opasyzdyq jasaý dep baǵalaýǵa bola ma?» degen suraq qoıǵan.
Ortalyq mundaı suraq qoıý beıhabar aýdıtorııany emotsııalyq pikirtalasqa tartyp, jalǵan sebep-saldarlyq baılanys qalyptastyratynyn, nátıjesinde paıdalanýshylarda oqıǵanyń shynaıy mán-jaıyna qatysty burmalanǵan túsinik qalyptasatynyn málimdedi.
— Bul jaǵdaıda naqty oqıǵa, ıaǵnı áskerı oqý-jattyǵýlardyń ótkizilý faktisi alynyp, oǵan shyndyqqa sáıkes kelmeıtin qosymsha málimet engiziledi. Odan keıin bastapqy habarlama pikirler, reposttar, qaıta jiberýler jáne skrınshottar arqyly taralýyn jalǵastyrady, — dep habarlady Jalǵan aqparatqa qarsy is-qımyl ortalyǵy.
Eske salaıyq, buǵan deıin Mańǵystaýdaǵy qaıǵyly oqıǵa týraly jalǵan aqparat taratqandar jazalanǵanyn habarlaǵan edik.
