Áskerı tehnıka, avıatsııa, jaýyngerlik sap túzeý – Sherýge daıyndyq qyzý júrip jatyr
ASTANA. KAZINFORM – 7 mamyr kúni elordanyń bas alańynda ótetin áskerı paradqa qyzý daıyndyq júrip jatyr. QR Qorǵanys mınıstrligi uıymdastyrǵan baspasóz týrynda BAQ ókilderi dalalyq jaǵdaıda ómir súrip, aıtýly sharaǵa daıyndyqty pysyqtap jatqan áskerılerdiń tynys-tirshiligimen tanysyp qaıtty.
4000-nan astam áskerı qyzmetshi qatysady
Parad úsh kezeńnen turady. Birinshisi kezeńde jaıaý áskerler júrip ótedi.
Tý ustaǵan toptar Táýelsizdik alańymen Jaýyngerlik Qyzyl Týdy, Qazaqstan aýmaǵynda qurylǵan dıvızııalardyń týlaryn alyp ótedi. Sonymen birge qarý asynǵan jáne soǵys jyldaryndaǵy áskerı kıimderdi kıgen eki saltanatty eseptop sap túzeıdi.
Ekinshi, ıaǵnı qazirgi kezdegi áskerı bólimde jıyrma úsh jaıaý paradtyq eseptop bolady. Olar: Qarýly kúshterdiń úsh túri, Arnaıy operatsııalar kúshteri, Desanttyq-shabýyldaý áskerleri, teńiz jaıaý áskerleri, áskerı polıtsııa, bitimgerlik bólimshesi, áskerı qyzmetshi áıelder qoraby, aýmaqtyq qorǵanys jáne áskerı oqý oryndary usynǵan top.
Saltanatty sharaǵa Ulttyq ulannyń, Tótenshe jaǵdaılar mınıstrliginiń jáne Memlekettik kúzet qyzmetiniń bólimsheleri qatysady. Árbir saltanatty eseptop 156 áskerı qyzmetshiden turady.
Sherý sońynda 300 mýzykanttan quralǵan birikken áskerı orkestrdiń defılesi ótedi.
— Áskerı parad – saltanatty sherý ǵana emes, bul halqymyzdyń batyrlyǵyn beıneleıtin dástúrli shara. Qazirgi tańda áskerı sherýge daıyndyq jospar boıynsha júrip jatyr. Paradqa barlyǵy 4000-nan astam áskerı qyzmetshi tartylady. Onyń 200-den astamy — áıelder. 300-den astam áskerı tehnıka men avıatsııalyq tehnıka qatysady, - dedi QR Qarýly Kúshteri Qurlyq áskerleriniń Bas qolbasshysy general-maıor Mereke Kóshekbaev.
Paradqa daıyndyq negizgi 3 kezeńnen turady:
1-kezeńde — áskerler bólek daıyndalady;
2-kezeńde — ındýstrııalyq qalashyqta ortalyq daıyndyq júredi, ol jerde tehnıkamen birlese daıyndyq ótedi.
3-kezeń — 3-5 mamyr kúni Astananyń bas alańynda ótetin sońǵy bas daıyndyq.
Qazirgi tańda áskerıler kún saıyn tańerteńgi 9-dan 13:00-ge deıin saptyq daıyndyq, tústen keıin 2 saǵat jeke daıyndyq ótkizip jatyr.
Paradqa qatysatyn áskerıler elimizdiń túkpir-túkpirinen kelip otyr. Olar saptyq daıyndyǵy, boıy jáne ózin jaqsy jaǵynan kórsetýi sekildi krıterııler boıynsha iriktelip alynǵan.
Áıel jaýyngerler arasynda kópbalaly analar da bar
Sherýge qatysatyn 200-deı áıel jaýyngerdiń arasynda boıjetken qyzdar ǵana emes, kópbalaly analar da bar eken. Qazaqtyń batyr arýlary — Álııa men Mánshúktiń izin jalǵap júrgen burymdy jaýyngerlerdiń ishinen 4 balanyń anasy, kishi serjant Aıdana Aıtqulovamen tildestik.
— Tarazdaǵy 81067 áskerı bóliminde qyzmet atqaramyn. Osynda 10 qyz keldik. Onyń 8-i saltanatty eseptik topta, ekeýimiz – tarıhı qoraptamyz. Áskerı salaǵa 2 jyl buryn keldim, 4 balanyń anasymyn. Negizgi mamandyǵym pedagog. Óz atam atty ásker sapynda Ekinshi dúnıejúzilik soǵysqa qatysqan. Sol atalarymyzdyń izin qýyp, osy salaǵa bet burdyq, - deıdi ol.
Áskerı paradqa kil tájirıbeli jaýyngerler ǵana emes, bul salaǵa jańadan kelgenderi de tartylypty.
— Óskemen qalasyndaǵy 27943 áskerı bólimnen kelip otyrmyn. Astanaǵa 28 naýryz kúni keldik, sodan beri daıyndyq júrip jatyr. Bizdiń áskerı bólimnen 3 qyz qatysyp jatyr. Ekeýi arnaıy qorapta jáne bir qyz tarıhı qorapta. Bundaı mańyzdy sharaǵa alǵash ret qatysyp otyrmyn. Áskerı salaǵa kelgenime 3 aı ǵana boldy, - dedi Shyǵys qurlyq jaıaý áskeriniń atynan kelgen Ásem Erlanqyzy.
Áskerı tehnıkalar sherýi
Paradqa qatysatyn áskerı tehnıkalardyń basym bóligi elimizdiń ózge óńirlerinen ákelingen. Olardyń tústeri birdeı bolǵanymen, syrynyń sapasy birkelki jaǵdaıda emes. Sondyqtan paradqa qatysar aldynda olar arnaıy tehnıkalyq blokta jańadan syrlanyp, sý jańa keıipke enedi.
— Birinshi tarıhı tehnıkalar ótedi. Ony T-34-85 tankisi bastaıdy. Odan soń ZIL-157, Katıýshalar ótedi. Sonymen tarıhı tehnıkalar bitedi. Zamanaýı tehnıkalar qatarynda T72, BMP2, BTR-80, artılerııa, traldar, 240 mm-lik ózi júretin mınomed, grad, tankige qarsy tehnıkalar, áýe shabýylyna qarsy tehnıkalar, arnaıy maqsattaǵy bólimsheler tehnıkasy, radıo-elektrondyq qorǵanys tehnıkalary, ınjenerlik tehnıkalar, hımııalyq qarýlarǵa qarsy tehnıkalar jáne sońynda Ulttyq ulannyń tehnıkalary júredi, - dedi QR Qarýly kúshteri Qurlyq áskerleri bas qolbasshysynyń orynbasary polkovnık Baýyrjan Ábırov.
Shatyrlar qalashyǵynda qaınaǵan ómir bar
Paradqa daıyndalyp jatqan sarbazdar dalalyq jaǵdaıda ómir súrip jatyr. Biraq shatyrlar qalashyǵynda ómirge kerektiń bári bar, gospıtal, ashana, monsha jumys istep tur.
— Paradqa qatysýshylarǵa áskerı medıtsınalyq kómek kórsetý maqsatynda qosarlanǵan medıtsınalyq pýnk ornatylǵan. Ol 4 bólikten turady: rentgen bólimi, jansaqtaý bólimi, protsedýralyq bólim jáne baılap-tańý bólimi. Jalpy, bul nysan alǵashqy medıtsınalyq kómek kórsetýge baǵyttalǵan, al emdeý kerek bolǵan jaǵdaıda jaýynger aýrýhanaǵa jiberiledi, - dedi dalalyq áskerı medıtsınalyq pýnktiniń bastyǵy podpolkovnık Aslan Asylhanov.
Kúnniń salqyndyǵyna qaramastan ár shatyrda temperatýra túnde 24 gradýsqa deıin jetip, jylytylady. Shatyr saıyn shaǵyn eki pesh bar, onda jaǵylatyn qurǵaq otyn men kómir aldyn ala daıyndalyp qoıǵan.
— Búgingi kúni paradqa daıyndyq aıasynda dalalyq lagerde 280-nen astam shatyr tigildi. Onyń 103-inde jeke quram ornalastyryldy. 11 shatyr turmystyq qajettilikterge arnalǵan, onda jaýyngerler jýynady, as ishedi jáne ydys-aıaq pen kıim-keshek jýady. 7 monsha bar. Áskerıler 3 ýaqyt tamaqtanady. Munda qalypty áskerı ómir úshin barlyq jaǵdaı jasalǵan, - dedi polkovnık, bas qolbasshynyń tyl jónindegi orynbasary Dáýlet Baıqulaqov.
Baspasóz týry sońynda BAQ ókilderi jaýyngerler ashanasynda tústenip, jaýyngerlerdiń qandaı as iship júrgenin kózben kórip qaıtty. Mundaǵy ashana úıdegideı bolmasa da, asynyń dámi til úıiredi.
Jaýyngerlerdiń ratsıonynda 48 túrli azyq-túlik kiredi eken. Al nandy jaýyngerler ózderi pisiredi, ol úshin arnaıy pesh ornatylǵan.