Áskerı tájirıbesi bar azamattar rezervtik qyzmetke shaqyrylyp jatyr
TARAZ. KAZINFORM — Jambyl oblysynda rezervtegi áskerı qyzmetti is júzinde engizý bastaldy. Jergilikti áskerı basqarý organdary negizgi eńbek qyzmetinen qol úzbeı jańa formatta qyzmet etýge daıyn azamattardy qabyldaýdy bastady.
Sharalar «Ońtústik» óńirlik qolbasshylyǵynyń qatysýymen ótip jatyr. Taraz qalasynyń qorǵanys isteri jónindegi basqarmasynda rezervtik bólimshelerdi aýmaqtyq prıntsıp boıynsha tolyqtyrý máseleleri qaraldy. Sol arqyly azamattar qyzmetti turǵylyqty jerinde atqaryp, jumys ornyn, jalaqysyn jáne áleýmettik jeńildikterin saqtaı alady.
Bolashaq rezervıstermen kezdesýlerde qyzmetke qabyldaý sharttary men qoıylatyn talaptar túsindirildi. Bul bastamaǵa buryn komandalyq jáne basqarýshylyq laýazymdarda qyzmet etken jáne áskerı tájirıbesi mol azamattar belsendi qatysýǵa qyzyǵýshylyq tanytty.
— Rezervtegi áskerı qyzmet formatyna ofıtserlik rezerv qyzmetkerleriniń qyzyǵýshylyq tanytýy osy formatqa degen suranysty kórsetedi. Biz kásibı jáne yntaly quramdy qalyptastyrýǵa nıettimiz, ol qorǵanys máselelerinde senimdi tirek bolady, — dedi «Ońtústik» óńirlik qolbasshylyǵy áskerleriniń qolbasshysy general-maıor Erjan Ibraev.
Áskerı rezervti qalyptastyrý zańnamaǵa sáıkes júzege asyrylady. Qyzmetke densaýlyǵy jaqsy, áskerı eseptik mamandyqqa ıe jáne qyzmet tájirıbesi bar Qazaqstan Respýblıkasynyń azamattary qabyldanady. Medıtsınalyq tekseris, kúsh-qýat jáne psıhologııalyq daıyndyqty baǵalaý, sondaı-aq kásibı suhbat qarastyrylǵan.
Qujattardy qabyldaý jergilikti áskerı basqarý organdary arqyly júzege asyrylyp, keıin materıaldar komıssııamen qaralady.
Rezervtegi áskerı qyzmet úsh jyl merzimge kelisimshart negizinde ótkiziledi jáne aı saıynǵy jalaqy men áleýmettik kepildikterdi qarastyrady. Rezervıster aıyna úsh ret jattyǵýlarǵa, jylyna bir ret 30 kúndik oqý jıyndaryna qatysady. Qyzmettegi shekti jas shegi: ofıtserler úshin — 60 jasqa deıin, qatardaǵy jáne serjanttyq quram úshin — 50 jasqa deıin belgilengen.
Aıta ketelik elde rezervtegi áskerı qyzmetke arnalǵan kelisimshart bekitilgen edi.