Áskerı taýarlardy zańsyz tasymaldaǵandarǵa qandaı jaza qoldanylady
ASTANA. KAZINFORM – Qazaqstanda áskerı jáne qosarly maqsattaǵy taýarlardy zańsyz tasymaldaý qylmystyq jáne ákimshilik jaýapkershilikke ákep soǵady. Bul týraly Memlekettik kirister komıteti Kedendik operatsııalar basqarmasynyń bas sarapshysy Zamıra Maldybaeva málim etti.
Onyń aıtýynsha, mundaı taýarlardyń eksporty, ımporty jáne tranzıti tek elektrondyq úkimet portaly arqyly rásimdelgen tıisti ruqsat qujattary bolǵan jaǵdaıda ǵana júzege asyrylady.
Zańnama talaptaryn buzǵany úshin Qylmystyq kodekstiń birqatar baby boıynsha jaýapkershilik qarastyrylǵan. Atap aıtqanda, ekonomıkalyq kontrabanda, áskerı jáne qosarly maqsattaǵy tehnologııalar men aqparatty zańsyz eksporttaý nemese ımporttaý, sondaı-aq aınalymy shektelgen zattardy zańsyz ótkizý faktileri qylmystyq jaýapkershilikke jatady.
Sonymen qatar EAEO kedendik shekarasy arqyly taýarlardy ótkizý kezinde tyıymdar men shekteýlerdi saqtamaý nemese tıisti ruqsatsyz kásipkerlik qyzmetpen aınalysý ákimshilik jaýapkershilikke ákep soǵady.
– Bul talaptar tek syrtqy ekonomıkalyq qyzmetke qatysýshylarǵa ǵana emes, zańsyz áreketke jol bergen laýazymdy tulǵalarǵa da qatysty. Sondyqtan jaýapkershilik óte joǵary, - dedi Zamıra Maldybaeva.
Buǵan deıin elimizde ózindik ereksheligi bar taýarlardy ákelý úshin lıtsenzııa qajet ekeni habarlanǵan bolatyn.