Áskerı tártipti retteıtin zańdy qaıta qaraý qajet — depýtat
ASTANA. KAZINFORM — Senator Andreı Lýkın óziniń depýtattyq saýalynda áskerı tártip pen áskerı polıtsııanyń jumysyn retteıtin zańdardy qaıta qaraý qajet ekenin aıtty.
Depýtattyń sózine qaraǵanda, áskerdegi tártip — onyń jaýyngerlik qabiletiniń negizi jáne jeke quramnyń moraldyq jaǵdaıyna, jaýapkershilik deńgeıine jáne jaýyngerlik tapsyrmany oryndaý qabiletine tikeleı áser etedi. Alaıda, áskerı qyzmetshiler arasyndaǵy quqyq tártibi men quqyq buzýdy aldyn alý máselelerin retteıtin qoldanystaǵy normalar qazirgi ahýalǵa saı kelmeıdi. Taldaý olardy júıeli túrde qaıta qaraý jáne jetildirý qajettigin kórsetedi.
Senatordyń aıtýynsha, bul áskerdegi tártipti saqtaý úshin ǵana emes, sonymen birge qoǵamnyń Qarýly Kúshterge degen senimin nyǵaıtý jáne eldiń ulttyq qaýipsizdigin qamtamasyz etý úshin de mańyzdy.
— Qabyldanyp jatqan uıymdastyrý jáne tárbıelik sharalarǵa qaramastan, júıeli problemalar saqtalyp otyr. Bul rette, bólimdi óz betinshe tastap ketý jaǵdaılary, jarǵydan tys áreketter, sybaılas jemqorlyq belgileri baıqalady. Aldyn alý jumysyndaǵy tıimdiliktiń jetkiliksizdigi, áskerı polıtsııa organdary, prokýratýra men qolbasshylyq arasynda úılestirýdiń álsizdigi sııaqty másele bar. Bul faktiler qoldanystaǵy quqyqtyq baza tártiptik rásimderdiń jetkilikti jaýapkershiligi men ashyqtyǵyn qamtamasyz etpeıtinin kórsetedi, — dedi Andreı Lýkın.
Senator áskerdegi quqyqtyq tártip pen tárbıe jumysyn nyǵaıtý qajettigi qoldanystaǵy zańnamalyq normalardyń sapasyna tikeleı baılanysty ekenin atap ótti. Búginde áskerı polıtsııa men qolbasshylyq qyzmetin retteıtin erejelerdiń bir bóligi eskirgen.
— Áskerı polıtsııa, qolbasshylyq jáne quqyq qorǵaý organdary arasyndaǵy fýnktsııalardy ajyratý, sondaı-aq tártiptik talaptardy buzý jaǵdaıyna monıtorınginiń tsıfrlyq júıelerin paıdalanýdy bekitý, áskerı bólimdi óz betinshe qaldyrǵany úshin jaýapkershilik normalaryn qatańdatýǵa baılanysty zańnamany kúsheıtýdi usynamyz. Áskerı psıhologtardy daıarlaý jáne sertıfıkattaý standarttaryn belgileıtin zańǵa táýeldi aktini qabyldaý, sýıtsıdtik jaǵdaılardyń aldyn alýdyń vedomstvoaralyq baǵdarlamasyn ázirleý qajet, — dedi depýtat.
Buǵan deıin áskerı oqý oryndarynda zamanaýı soǵys talaptaryna saı mamandar daıarlanyp jatqanyn jazǵan edik.