Áskerı tártipti buzǵan sarbazdar jasandy ıntellekt arqyly anyqtalady
ASTANA. KAZINFORM – Áskerı tártipti buzǵan nemese áskerı jarǵy talaptaryn oryndamaǵan sarbazdar jasandy ıntellekt arqyly anyqtalady. Bul týraly QR Qorǵanys mınıstriniń orynbasary Darhan Ahmedıev málim etti.
«Jasandy ıntellekt tehnologııasy aıasynda beınejazbaǵa taldaý jasaý júıesin engizýdiń qanatqaqty jobasy iske asyrylyp jatyr. Bul joba arqyly áskerı obektiniń qaýipsizdigi men qorǵanys qabiletin qamtamasyz etý, bógde adamdardy anyqtaý, avtokólik nómirin taný, adamdar toptalyp jınala bastaǵanyn anyqtaý, qarý saqtaý bólmesinde baqylaýdy kúsheıtý, áskerı obekti men qoımalardyń perımetrin qorǵaý qamtamasyz etiledi», - dedi D. Ahmedıev Ortalyq kommýnıkatsııalar qyzmetindegi baspasóz máslıhatynda.
Bul turǵyda tilshiler áskerı bólimderdegi dárethanaǵa jaqyn ornalasqan dálizderde qosymsha beınekameralar ornatý múmkindigi týraly suraq qoıdy. «Áskerdegi tártipti buzý áreketteri jıi bolyp jatatyn oryndarda qosymsha kameralar ornatyla ma?» dep surady tilshiler.
Óz kezeginde Darhan Ahmedıev beınekameramen qamtylǵan aýmaqtarǵa qatysty tıisti zertteý júrip jatqanyn aıtty. Bul rette áskerı polıtsııamen birlese qosymsha kameralar ornatylatyn oryndar aıqyndalyp jatyr.
«Tıisti buıryqqa ózgeris engizilip, osyny áskerı bólimshelerde oryndaý mindetteledi. Biz beınekameralar men tehnıkalyq qaýipsizdik quraldaryn satyp alýdy ortalyqsyzdandyrdyq. Qazir áskerı bólim joǵary turǵan organǵa qaramastan óz betinshe qajet ınfraqurylym jabdyqtaryn satyp alyp, jańarta alady», - dedi mınıstrdiń orynbasary.
Onyń aıtýynsha, jasandy ıntellekt beınebaqylaý júıesi arqyly áskerdegi zańsyzdyqty anyqtaıdy.
«Dárethananyń ishinde eshkim kamera ornatpaıdy, biraq dálizderde kameralar bolady. Sonymen qatar barlyq túsirilip jatqan beınejazbany zertteý úshin jasandy ıntellekt engizemiz. Sarbazdar toptalyp jınalsa nemese adamdar belgili bir ýaqyt aralyǵynda nazardan tys kórinbese, onda osy júıe kezekshige de, joǵary turǵan organdarǵa da sıgnal beredi. Munymen qosa, bul júıege áskerı polıtsııa ókilderi qosylady», - dedi Darhan Ahmedıev.
Jaqynda Qazaqstan áskerindegi zańsyz áreketterdi anyqtaý úshin beınebaqylaý júıesi jańartylatynyn jazǵan edik. Beınebaqylaý kameralary jasandy ıntellekt arqyly basqarylady.
