Áskerı sýdıalar mereıtoı qurmetine oraı marapattaldy

ASTANA. QazAqparat - Búgin Elordadaǵy Áskerı-tarıhı mýzeıde elimizdiń Áskerı sotynyń damýynan syr shertetin arnaıy burysh ashyldy. Áskerı sottyń 25 jyldyq mereıtoıyna arnalǵan shara barysynda qyzmetinde zor tabysqa jetken birqatar sýdıa «Qazaqstan Respýblıkasy áskerı sotyna 25 jyl» medalimen marapattaldy, dep habarlaıdy QazAqparat.

«Bizdiń sharamyz QR Áskerı sotynyń qurylýynyń 25 jyldyǵyna arnalǵan. 1992 jyly áskerı trıbýnal bazasynda áskerı sot qurylǵan bolatyn. 25 jyldyń ishinde Qazaqstannyń jalpy sot júıesinde aýqymdy jumystar atqaryldy. 5 ınstıtýttyq reformada zań ústemdigi aıryqsha oryn alǵan. Bizdiń áskerı sýdıalarymyz áskerı qyzmetshiler men áskerı vedomstvolardyń zańdy múddelerin, bostandyqtaryn quqyqtaryn qorǵaýda zor úles qosýda», - dedi BAQ ókiline suhbat bergen  QR Áskerı sotynyń tóraǵasy Sáken Abdýlla.

Sonymen qatar ol áskerı sottyń sýdıasy áskerı emes adamnyń bolǵandyǵy durys dep sanaıtyndyǵyn atap ótti.

«Qalaı desek te sýdıa táýelsiz bolǵany jón. Ol áskerı qyzmetshi bolmaǵany durys. Eger ol áskerı qyzmetshi ári QR Qarýly kúshteriniń quramynda bolatyn bolsa, onda ol jarǵyǵa baǵynýy mindetti. Al eger ol jarǵyǵa baǵynatyn bolsa, onda sheni joǵary adamǵa da baǵynýy tıis», - dedi Sáken Abdýlla.

Esterińizge sala ketsek, 1992 jyldyń 20 qańtarynda QR Joǵarǵy keńesi Tóralqasynyń qaýlysymen QazKSR aýmaǵynda jumys istegen áskerı trıbýnal Qazaqstan Respýblıkasynyń qaraýyna berilgen bolatyn.