Áskerı-sporttyq oıyndar jalaýyn kóterdi - QR QM

ASTANA. 23 sáýir. QazAqparat - Búgin Astana qalasynda «Jas ulan» respýblıkalyq mektebi men respýblıkalyq áskerı mektep ınternattarynyń tárbıelenýshileri arasynda Qorǵanys mınıstriniń birinshi orynbasary - Qarýly Kúshter Bas shtaby bastyǵynyń júldesi úshin áskerı-sporttyq oıyndar alǵash ret jalaýyn kóterdi.

Saltanatty sap túzegen túlekterdi Qorǵanys mınıstriniń birinshi orynbasary - Qarýly Kúshter Bas shtaby bastyǵy general-polkovnık S. Jasuzaqov týrnırdiń bastalýymen quttyqtady.

Saltanatty rásimnen keıin armııa generaly S.Q.Nurmaǵambetov atyndaǵy «Jas ulan» mektebiniń, T.Bıgeldinov atyndaǵy áskerı mektep-ınternattyń (Qaraǵandy qalasy), B.Momyshuly atyndaǵy áskerı mektep-ınternattyń (Almaty qalasy), S.Rahymov atyndaǵy áskerı mektep-ınternattyń (Shymkent qalasy) 15-17 jastaǵy 300-den astam oqýshylary saltanatty sap túzep ótti.

«Jas ulan» respýblıkalyq mektebi men respýblıkalyq áskerı mektep ınternattarynyń tárbıelenýshileri arasynda ótetin jarystyń aýqymy keń. Oqýshylar júgirýden, kishi kalıbrli vıntovkadan nysana kózdeýden, avtomatty bólshektep jınaýdan, granata laqtyrýdan, kir tasyn kóterýden jáne taǵy basqa áskerı sport túrlerinen kúsh synasady.

«Jarystyń maqsaty tárbıelenýshilerdiń boıynda áskerı-tehnıkalyq bilim, bilik pen daǵdyny qalyptastyrý, batyldyqqa, uıymdastyrýshylyqqa tárbıeleý, tártip pen joldastyq sezimdi qalyptastyrý bolyp tabylady»,-delingen QR QM baspasóz qyzmetiniń málimetinde.

Bolashaq jaýyngerler tórt kún boıy ózara saıysqa túsedi. Búgin bastalǵan saıystar 26 sáýir kúni aıaqtalyp, jeńimpaz komanda Kýbokpen jáne gramotalarmen marapattalatyn bolady.