Áskerı sportshylar Rımde ótken kúres týrnırinde júldeger boldy

RIM. QazAqparat - Rımde kúres túrlerinen halyqaralyq reıtıngtik týrnır óz máresine jetti. Jarystyń sońǵy kúninde erkin stıldegi ásker balýandary kúmis jáne qola medaldi qanjyǵaǵa baılady, dep habarlaıdy QazAqparat.

Aýqymdy týrnırge álemniń 32 elinen 350-den astam atlet qatysty. Onyń arasynda Olımpıada oıyndarynyń, álem jáne Eýropa chempıonattarynyń jeńimpazdary men júldegerleri de bar.

Týrnır qorytyndysy boıynsha 70 kelige deıingi salmaq dárejesinde kúmis medaldi QR Qorǵanys mınıstrligi ortalyq sport klýbynyń sportshy-nusqaýshysy Dáýlet Nııazbekov jeńip aldy.

74 kelige deıingi salmaq dárejesinde OSK sport rotasynyń merzimdi qyzmettegi áskerı qyzmetshisi qatardaǵy jaýynger Nurqoja Qaıpanov qola júldeger atandy.

Atalǵan reıtıngtik týrnır birneshe jyl qatarymen Birikken kúres stılderi halyqaralyq federatsııasynyń vıtse-prezıdenti bolǵan Matteo Pellıkoneni eske alýǵa oraı ótkiziledi.

Týrnırde olımpıada lıtsenzııasy oınatylmaıdy, alaıda sportshylardyń reıtıngisine áser etedi.

Nátıje alda bolatyn negizgi jarystarǵa irikteý kezinde eskeriledi.