Áskerı sportshylar MMA chempıony atanyp, júldege ıe boldy
Bahreın ámirliginde IMMAF ı WMMAA birlesken federatsııasynyń qoldaýymen MMA álem chempıonaty aıaqtaldy. QR Qorǵanys mınıstrligi Ortalyq armııa sport klýbynyń sportshylary Qazaqstan Qarýly kúshteriniń qorjynyna 1 altyn jáne 2 kúmis medal qosty.
Álem chempıonatynyń birinshiliginde «altyndy» AOSK komandasynyń áskerı qoıan-qoltyq kúresten sportshy-nusqaýshy Talshyn Jumataeva ıelendi. Fınaldyq kezdesýde 70,3 kelige deıingi salmaq dárejesinde óziniń otandasy Aızat Ábdiqadyrdy jeńdi.
Elimizge kúmis medaldardy áskerı sportshylar kapıtan Saǵyn Qazbek pen Tursyn Aıan ákeldi.
Qoıan-qoltyq kúresten eki dúrkin chempıon, halyqaralyq sanattaǵy sport sheberi kapıtan Saǵyn Qazbek 52,2 kelige deıingi salmaq dárejesi boıynsha «altynǵa» baq synar kezinde qarsylasy Baǵdat Jubanyshevke ese jiberdi. 47,6 keli salmaq dárejede AOSK sportshysy Aıan Tursyn fınaldyq kezdesýde shved qarsylasyna jol berdi.
«Synǵa túsken áskerı sportshylar qoıan-qoltyq urystan tatamı sheberleri bolǵandyqtan, kımonosyz basqa formatta óner kórsetý ońaı soqqan joq. Buǵan qaramastan bizdiń sportshylar fınalǵa jetip, jaqsy nátıje kórsetti. Baıraqty básekege álemniń ár elinen 500-den asa sportshy qatysty», - dep atap ótti qoıan-qoltyq urys boıynsha AOSK komandasynyń bastyǵy Murat Bıjanov.
