Áskerı spartakıadada jaqsy nátıjeler bar
ASTANA. Shildeniń 28-i. QazAqparat - Qazaqstan Qarýly Kúshteriniń sportshylary TMD-ǵa múshe memleketterdiń dostastyq áskerleri arasynda ótetin VII Spartakıadasyna qatysý úshin Sankt-Peterbýrgke attanyp ketken edi. Armııashy sportshylardyń quramynda Qorǵanys mınıstrligi Sport komıteti - Armııashylardyń ortalyq sport klýbynyń tóraǵasy polkovnık Erlan Talasbaev bastaǵan ujym jetekshileriniń ókilderi bar, dep habarlaıdy Qorǵanys mınıstrliginiń baspasóz qyzmeti.
- Qazaqstannyń áskerı sportshylary TMD elderi arasynda ótetin memleketaralyq jarystarǵa belsendi túrde qatysyp júr, - dep atap ótti AOSK-nyń bastyǵy. - Biz 2003 jyly Almatyda birinshi ret dostastyq áskerleri arasynda ótken IV Spartakıadaǵa kelýshilerdi qabyldadyq, sol kezden bastap turaqty qatysyp kelemiz.
Qazaqstan qurama komandasynyń quramynda kir tasyn kóterý qos saıysynan álem chempıondary, elimizge eńbegi sińgen sport sheberleri Vıtalıı Dıdenko men Vladımır Kress, Olımpıada oıyndaryna qatysqan halyqaralyq dárejedegi sport sheberi sýǵa júzýshi Evgenıı Ryjkov, erkin kúresten sport sheberleri Seıfaddın Osmanov pen Andreı Svatkovskıı, sondaı-aq tájirıbeli quralaıdy kózge atqan mergender Baýyrjan Tólenov pen Galına Teder sııaqty sport sańlaqtary bar. Qazaqstandyq armııashylar sporttyń bes túri boıynsha óner kórsetetin bolady.
- Neva jaǵalaýynda ótetin VII oıyndarǵa attana otyryp, biz joǵary nátıjelerge jetetindigimizge senimdimiz, - degen edi Sport komıtetiniń tóraǵasy polkovnık Erlan Talasbaev. - Sportshylarymyzdyń tájirıbesi mol, jastarymyzdyń jeńiske degen umtylysy erekshe.
Qazirgi kúni osy mártebeli jarystarda bizdiń armııashyl sportshylarymyzdyń jaqsy nátıjelerge qol jetkizip otyrǵany málim boldy.
Osy ýaqytta komanda kópsaıystan jalpy esep boıynsha 2-shi oryndy ıelenip otyr. Jeke synaq nátıjeleri boıynsha praporşık Alekseı Sesorov chempıon bolyp tur.
Erkin kúrestiń komandasy da alda kele jatyr. Olardyń qorjyndarynda qazirdiń ózinde 3 medal bar: 1 altyn, eki kúmis. Komanda tórt salmaq dárejesinde óner kórsetti. Búgin aýyr salmaq pen sýper aýyl salmaqty sportshylardyń básekeleri josparlanyp otyr.
Búgin sýda júzý saıysynyń qorytyndylary shyǵarylady. Bul saıystarda da qazaqstandyq sportshylar aldyńǵy qatardan kórinip otyr. Olardyń qanjyǵasynda 5 altyn medal bar. Jalpy esep boıynsha olar birinshi orynda keledi. Jarystar jalǵasýda.
Eske sala keteıik, burnaǵy jyldary Reseıdiń Samara qalasynda ótken Spartakıadada qazaqstandyq armııashylar resmı esep boıynsha júldeli úshinshi orynǵa ıe bolǵan edi.
