Áskerı sottar armııadaǵy álimjettik máselesin qatań baqylap keledi
ASTANA. QazAqparat - Ótken jyly Qazaqtandaǵy áskerı gornızondardyń sottarynda 194 qylmystyq is boıynsha 255 azamatqa qatysty sheshim shyǵaryldy. Olardyń ishinde 248 adam jazalandy. 71 adam bostandyǵynan aıyrylsa, jeteýi aqtalyp shyqty, dep xabarlaıdy QazAqparat tilshisi.
Budan bólek, 65 adamǵa qatysty 53 is toqtatylyp, 16 qylmystyq is prokýratýra organdaryna qaıtaryldy. Jalpy, ótken bir jyldyń ishinde 264 qylmystyq is qaraldy. «Atalǵan isterdiń basym bóligi - áskerı qylmystar. Sonyń ishinde áskerıler arasyndaǵy qarym-qatynastarǵa qatysty erejelerdi buzý, sondaı-aq qyzmet babyn asyra paıdalaný áreketteri de bar», - delingen QR Áskerı sotynyń 2016 jylda atqarǵan jumysyna qatysty resmı xabarlamada.
Ótken jyly sarbazdardyń ólimine qatysty qylmystyq ister de qaraldy. «Byltyr biz bir emes, birneshe isti qaradyq. Olardyń barlyǵyna qatań jaza taǵaıyndaldy. Bári de bas bostandyqtarynan aıyryldy. Ol jaǵynan biz óte qatań qaraımyz», - dedi qylmystyq ister alqasynyń tóraǵasy Jandos Musabekuly Astanada ótken baspasóz máslıxatynda.
QR Áskerı sotynyń tóraǵasy Sáken Abdýllaevtyń aıtýynsha, áskerı sottar álimjettik máselesine basa nazar aýdaryp keledi. «Qazirgi kezde bizde Taldyqorǵan garnızonyndaǵy bir jaǵdaı bar. Ázirshe tergeý júrip jatyr. Bizge túsken boıda arnaıy baspasóz máslıxatyn ótkizetin bolamyz», - deıdi ol.
