Áskerı sherýge Uly Otan soǵysynyń ardagerleri joǵary baǵa berýde
Joǵary deńgeıli áskerı sherýge jaqyn jáne alys shetelden meımandar, shet memleketterdiń dıplomatııalyq mıssııalarynyń ókilderi, elorda turǵyndary men basqa óńirlerden kelgen qonaqtar kelip tamashalady.
Alaıda sherýde oq pen soǵys otyn keshken Uly Otan soǵysy ardagerleriniń mańyzy da qadiri de joǵary boldy. Olar biraýyzdan búgingi Konstıtýtsııanyń 15- jyldyǵyna arnalǵan áskerı sherýdiń bıik deńgeıde uıymdastyryldy dep ádil baǵalaryn berip jatty.
«Bul meniń ekinshi ret qatysýym. Bıylǵy sherý joǵary deńgeıde ótti. Áskerı sherý - el úshin asa mańyzdy shara. Sondyqtan Konstıtýtsııanyń mereıtoıyn áskerı paradpen qarsy alý - Qazaqstan úshin dástúrli bolǵany durys. Osyndaı joǵary deńgeıde atap ótý arqyly biz - negizgi Ata Zańymyzǵa degen izetimizdi bildiremiz», dedi Astana qalasy Saryarqa aýdany boıynsha ardagerler keńesiniń tóraǵasy, polkovnık Ǵalıásker Jantemirov.
Elbasynyń qabyldaýymen ótken aıtýly sharanyń aýqymyna, uıymdastyrylýyna Uly Otan soǵysynyń ardageri Mahmetkázim Daýtovtiń de tańdanysynda shek bolmady. «Qazaqstan Konstıtýtsııasynyń 15 jyldyǵy osynaý paradpen atalyp ótildi. Alda áskerı tehnıkalardy tek merekelik sherýlerden ǵana kóreıik. Soǵys oty tutanbasyn. Ár qaısysymyzǵa beıbit ómir qajet», dep tiledi ardager.
Taǵy bir ardagerimiz Valerıı Dýhanovskıı sherýden alǵan áserin aıtyp, áskerı qaqtyǵystardyń, soǵystardyń azabyn bermesin dep tilek bildirip jatty.
«Parad óte jaqsy uıymdastyrylǵan. Men byltyr ótken sherýde boldym. Degenmen bıyl óte kóp jumys jasalǵany kórinip tur. Áskerılerdiń sap túzip júrgenderi minsiz. Mýzykalyq áýenmen bir yrǵaqta júrip ótti. Ushqyshtar bolsa áýede tipti qatty qýantty. Olardyń aspanda otshashýlarmen sýret salǵandary qandaı keremet. Bizdiń aspanymyz árqashan ashyq bolsyn, áskerı tehnıkalarymyzdy tot baspasyn, biraq ony soǵysta qoldanýǵa da buıyrtpasyn», deıdi V. Dýhanovskıı.
Áskerı sherýge Qorǵanys mınıstrliginiń Qurlyqtaǵy áskerleri, Áýe qorǵanysy kúshteri jáne Áskerı-Teńiz kúshteri, sondaı-aq Іshki ister mınıstrliginiń, Ulttyq qaýipsizdik komıtetiniń, Tótenshe jaǵdaılar mınıstrliginiń jáne Respýblıkalyq Ulannyń jasaqtary qatysyp, 150-ge tarta áskerı tehnıkanyń marshy ótti.