Áskerı sherýge baılanysty Astananyń birqatar kósheleri jabylady

ASTANA. 26 tamyz. QazAqparat - 30 tamyz, Konstıtýtsııa kúni áskerı sherý barysynda Astananyń birqatar kósheleri jabylady. Bul jóninde búgin jýrnalısterge bergen suhbatynda Astana qalasy ishki ister departamenti jol polıtsııasy basqarmasynyń bastyǵy Baqytjan Malybaev málimdedi,

dep habar taratty vedomstvonyń baspasóz qyzmeti.

«El Konstıtýtsııasynyń 16-jyldyǵyna arnalǵan áskerı sherý ótetin ýaqytta «Qazaq eli» alańynda jol qozǵalysynyń qaýipsizdik sharalary kúsheıtilip, qalanyń birqatar kósheleri jabylady», - dedi B. Malybaev.

Onyń aıtýynsha, 30 tamyz kúni saǵat tańerteńgi 8-den is-shara aıaqtalǵanǵa deıin (shamamen saǵat 13.00-ge deıin) kóshelerdiń myna bólikteri boıynsha qozǵalys tolyqtaı toqtatylady: Abylaıhan dańǵylynan Saraıshyq kóshesine deıin Momyshuly dańǵyly boıynsha; Abylaıhan dańǵylynan Táýelsizdik dańǵylyna deıin Aınakól kóshesi boıynsha; M-1 kópirinen Táýelsizdik dańǵylyna deıin kólik qozǵalysyn Orynbor kóshesine burý arqyly R. Qoshqarbaev kóshesi boıynsha; M-3 kópirinen Táýelsizdik dańǵylyna deıin kólik qozǵalysyn Orynbor kóshesine burý arqyly Sh. Qaldaıaqov kóshesi boıynsha; Táshenov kóshesinen Sh. Qaldaıaqov kóshesine deıin Táýelsizdik dańǵyly boıynsha.

Jolaýshy kólikteri B. Momyshuly, Saraıshyq, Orynbor, Syǵanaq kósheleri arqyly júredi. Áskerı sherýdi kórýge kelgen halyq B.Momyshuly dańǵyly jaǵynan Táýelsizdik dańǵyly boıynsha jáne B.Momyshuly dańǵyly jaǵynan R.Qoshqarbaev kóshesi boıynsha jaıaý ótkiziledi.

«Osyǵan baılanysty Astana jol polıtsııasy basqarmasy eloranyń turǵyndary men qonaqtaryn ózderine tıimdi baǵytyn aldyn-ala tańdap, qoǵamdyq kólikterge kedergi keltirmes úshin jeke kólikpen kelmeýlerin ótinedi», - dep eskertti B. Malybaev.