Áskerı rezervtegi adamnyń jumys orny saqtalady – Qorǵanys mınıstri
Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine rezervtegi qyzmet máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy Kazinform.
Zań jobasynda áskerı qyzmettiń jańa túrin - rezervtegi qyzmetti engizý usynylady. Zań jobasyna sáıkes rezervtegi qyzmet - bul aýmaqtyq qaǵıdaty boıynsha (turǵylyqty jeri boıynsha) áskerı qyzmettiń erikti túri.
«Rezervtegi qyzmet týraly zań jobasyn ázirleýge jumyldyrý júıesin odan ári jetildirý negiz boldy. Bul normalar áskerı bólimdi adamı resýrspen kepildi qamtamasyz etýge rezervte bolatyn jaýyngerlik daıyn kúshti qurýǵa múmkindik beredi. Zań jobasyn iske asyrý úshin eki kodekske, tórt zańǵa ózgeris engiziledi», - dedi Qorǵanys mınıstri Rýslan Jaqsylyqov.
Onyń aıtýynsha, Qylmystyq kodekske rezervtegi jaýyngerdi áskerı quqyq buzý sýbektisine jatqyzý boıynsha ózgeris engiziledi. Eńbek kodeksine jumys berýshi men rezervtegi áskerı arasyndaǵy eńbek qatynasyn retteý boıynsha túzetý jasalady. Al «Áskerı qyzmet jáne áskerı qyzmetshilerdiń mártebesi týraly» Zańǵa rezervtegi áskerı adam mártebesin, onyń quqyǵy men mindetin belgileý, rezervtegi áskerıdiń mindetin oryndaý kezeńin aıqyndaý, rezervte qyzmet ótkerý boıynsha ózgeris engiziledi.
Sonymen qatar, «Sybaılas jemqorlyqqa qarsy is-qımyl týraly», «Qazaqstan Respýblıkasynyń memlekettik qyzmeti týraly» zańdaryna memlekettik qyzmetshiniń rezervte qyzmet etý múmkindigi boıynsha ózgeris jasalady.
«Zań jobasyn iske asyrý azamattarǵa rezervte áskerı qyzmet etýge múmkindik beredi. Ol úshin kelisimshart erikti túrde úsh jylǵa jasalady. Daıarlyq bir jylda eki aıdan aspaıdy. Jaýyngerlik jıyndar 30 kúnde iske asyrylady. Rezervtegilerge arnalǵan sabaqtar aı saıyn eki-úsh kún bolady», - dedi mınıstr.
Onyń sózine qaraǵanda, bul is-sharalarǵa qarajat respýblıkalyq bıýdjet esebinen qarastyrylady. Birinshiden, tıisti sabaqtar kezinde aı saıyn eń tómengi jalaqy tóleý eskerilgen. Ekinshiden, jaýyngerlik jıyndar kezinde ortasha jalaqy tóleý josparlanǵan.
«Áskerı rezervtegi adam qyzmet etken kezde jumys orny saqtalady. Zańdy qabyldaý áleýmettik turǵydan tıimdi. Rezervke qyzmetke kirgen azamattyń kirisi artady. Bul qyzmetti engizý beıbit ýaqytta ásker sanyn arttyrmaı, qoıǵan mindetti oryndaýǵa daıyn azamattar sanyn daıarlaýǵa múmkindik beredi», - dedi Rýslan Jaqsylyqov.
Taratylǵan málimetke qaraǵanda, rezervke adamdar erikti túrde tartylady. Olarǵa densaýlyq jaǵdaıy boıynsha talaptar qoıylady. Sonymen qatar, ofıtserler 60 jasqa deıin, al serjanttar men sarbazdar 50 jasqa deıin bolýy kerek. Rezervtegiler daıyndyqty áskerı bólimderde ótedi jáne olarǵa tıisti qarý-jaraq pen tehnıka bekitiledi.
«Rezertegi qyzmetti 2025 jyly qalyptastyrý josparlanǵan. Osy ýaqyt aralyǵynda barlyq áleýmettik máselelerdi sheshý kerek. Birinshi kezeńde rezervke 2 myńǵa jýyq adamdy shaqyrtý eskerilgen. Bul baǵytta jylyna 3,5 mlrd teńge shamasynda qarajat kerek. Osy júıeni nyǵaıtqannan keıin, aldaǵy ýaqytta rezervtegiler sany arta túsedi», - dedi vedomstvo basshysy.
