Áskerı polıtsııa organdarynyń jeke quramy Qazaqstannyń qorǵanys qabilettiligine mańyzdy úles qosýda - S.Jasuzaqov
ASTANA. 24 qarasha. QazAqparat - Búgin Astanada Qazaqstan Respýblıkasy Qarýly Kúshteri Áskerı polıtsııa organdary bastyqtarynyń úsh kúndik jıyny aıaqtaldy. Bul basqosýda jaýyngerlik jáne jumyldyrý daıyndyqtary, sondaı-aq aǵymdaǵy jyldyń qyzmeti qorytyndylandy, dep habarlaıdy QR Qorǵanys mınıstrliginiń baspasóz qyzmetinen Oksana Parpýra.
Іs-shara mınıstrdiń birinshi orynbasary - Qazaqstan Respýblıkasy Qorǵanys mınıstrligi Shtabtar bastyqtary komıtetiniń tóraǵasy, general-polkovnık Sáken Jasuzaqovtyń jetekshiligimen ótti.
Jıynda áskerı tártip saqshylary áskerı polıtsııa qyzmetiniń bedelin arttyrý máselelerin talqylap, naqty usynystaryn ortaǵa saldy.
- Qorǵanys mınıstrliginiń basshylyǵy áskerı-quqyqtyq tártipti qamtamasyz etýde áskerı polıtsııa organdaryna aıryqsha múmkindik berip otyr. Sondaı-aq, olardy tehnıkalyq turǵydan jaraqtandyrý men jeke quramnyń sapaly daıyndyǵyna da barynsha kóńil bólip keledi, - dep atap ótti general-polkovnık Sáken Jasuzaqov. - Áskerı polıtsııa organdaryn damytýǵa arnalǵan úshjyldyq baǵdarlama jasalyp, sonyń nátıjesinde, avtomobıldik tehnıkamen, arnaıy quraldarmen, jańa kıim úlgisimen jáne qajetti quraldarmen qamtamasyz etý qarastyrylǵan.
Jıyn barysynda Prezıdent Jarlyǵy talaptaryna sáıkes sybaılas jemqorlyqtyń aldyn alý sharalaryn kúsheıtýge qatysty máseleler de talyqylandy.
Sońǵy jyldary Qazaqstan armııasynda tártip buzýshylyq pen qylmystyń aıtarlyqtaı qysqarǵany baıqalady. Bul Qarýly Kúshterdegi quqyq tártibin qamtamasyz etýdegi jetistikter ekeni anyq. Ústimizdegi jyldyń 10 aıynda áskerlerde ótken jyldyń on aıymen salystyrǵanda, tártip buzýshylyq 21 paıyzǵa qysqarǵan.
QR QK Áskerı polıtsııa bas basqarmasynyń bastyǵy, ádilet polkovnıgi Talǵat Saǵymbekov ár deńgeıdegi komandırler men bastyqtardyń jeke quramǵa tárbıe berý jumysyn júrgizýge meılinshe jaýapkershilikpen qaraý kerek ekenin atap ótti.
Mınıstrdiń birinshi orynbasary - Qazaqstan Respýblıkasy Qorǵanys mınıstrligi Shtabtar bastyqtary komıtetiniń tóraǵasy, general-polkovnık Sáken Jasuzaqov atqarylǵan jumystarǵa rızashylyǵyn bildirip, áskerı polıtsııa jeke quramynyń elimizdiń qorǵanys qabiletin qamtamasyz etýdegi eńbegin joǵary baǵalady.
