Áskerı polıtsııa qurylǵan kúnin atap ótti

ASTANA. 22 sáýir. QazAqparat - Búgin Qazaqstan Respýblıkasy Qarýly Kúshteriniń Áskerı polıtsııasy qurylǵanyna 16 jyl tolýyn atap ótýde. Ol 1997 jyly sáýir aıynda Qarýly Kúshterde quqyq qorǵaýdy qamtamasyz etý maqsatynda, sondaı-aq áskerı qylmystardy tekserý úshin «Qazaqstan Respýblıkasy quqyq qorǵaý organdarynyń júıesin odan ári reformalaý jónindegi sharalar týraly» Elbasynyń Jarlyǵymen qurylǵan bolatyn.

«Qazirgi kezde áskerı polıtsııa organdarynda tórt áskerı polıtsııa otrıady, 16 bólim, 4 bólimshe jáne áskerı polıtsııa mamandaryn daıarlaıtyn Ortalyq jumys istep tur. Olardyń barlyǵy zamanaýı quraldarmen jáne áskerı tehnıkamen jabdyqtalǵan»,- deıdi áskerı polıtsııa bas basqarmasynyń bastyǵy polkovnık Tımýr Dándibaev

«Áskerı tártip pen quqyq tártibi áskerlerdiń jaýyngerlik daıarlyǵynyń negizi bolyp sanalady. Búginde áskerlerdiń kúndelikti tynys-tirshiligin áskerı polıtsııanyń qatysýynsyz elestetý múmkin emes. Áskerı polıtsııa quqyq buzýshylyqtyń aldyn alý, áskerı tehnıkany alyp júrý, garnızondarda patrýldik qyzmet, jattyǵý kezinde quqyqtyq tártipti qamtamasyz etý, qylmysty ashý jáne onyń jolyn kesý, áskerı qyzmetshilerdi izdestirý sııaqty mańyzdy mindettermen qosa basqa kóptegen fýnktsııalardy atqarady. Óziniń qurylǵan kúninen bastap áskerı polıtsııa organdary orasan zor jumystar atqardy. Ony Qarýly Kúshterde tirkelgen tártip buzýshylyqtyń jyl saıyn kemip kele jatqandyǵynan kórýge bolady»,-delingen QR QM baspasóz qyzmetiniń málimetinde.

Qurylǵan kúni qarsańynda Aqmola óńirlik garnızony Áskerı polıtsııa otrıady ashyq esik kúnin ótkizdi. Oǵan astanalyq № 34 mekteptiń oqýshylary shaqyryldy. Oqýshylar áskerı polıtsııada ótkizilgen erekshe ekskýrsııaǵa dán rıza boldy. Olar osyndaǵy áskerı qarý-jaraqtar men áskerı tehnıkany, mergenderdiń, granatametshilerdiń, arnaıy maqsattaǵy áskerlerdiń kıim-keshek úlgileri men jabdyqtardy kórip tamashalady. Áskerı polıtsııa otrıadynyń alańynda balalar arnaıy úıretilgen ıtterdiń is-qımylyn kórý múmkindigine ıe boldy.

Qazirgi tańda áskerı polıtsııanyń Qarýly Kúshterdegi orny erekshe. Áskerı bólimder men tárbıe qurylymdary arasyndaǵy júıeli jumystyń nátıjesinde áskerlerde tártip buzýshylyqty aıtarlyqtaı qysqartýǵa qol jetkizildi.