Áskerı polıtsııa Qarýly kúshterde quqyq buzýshylyqty jyl saıyn orta eseppen 10-15 % tómendetýge yqpal etti
ASTANA. 26 sáýir. QazAqparat - Qazaqstan Respýblıkasy Qarýly kúshteriniń Áskerı polıtsııasy bıyl 15 jyldyq mereıtoıyn atap ótti.
Áskerı polıtsııa 1997 jyly sáýir aıynda «Qazaqstan Respýblıkasynyń quqyq qorǵaý organdary júıesin odan ári reformalaý sharalary týraly» Prezıdent Jarlyǵymen quryldy. Onyń basty mindeti Qarýly kúshterinde quqyq qorǵaýdy qamtamasyz etý men áskerı qylmystardyń betin ashý bolyp tabylady.
Áskerı polıtsııa bas basqarmasyn 90-shy jyldardyń sońynda general-maıor Hákimov Shámil basshylyqqa aldy. Ol áskerı polıtsııanyń qurylýy men damý isine qýatty tynys berip, 15 jyl ishinde áskerı qurylymdardyń arasynda berik bólim retinde qalyptastyrǵan áskerı qyzmetshilerdiń bekem negizin qurdy.
2005 jyly qabyldanǵan «Áskerı polıtsııa organdary týraly» Qazaqstan Respýblıkasynyń Zańy QR Qarýly kúshteri Áskerı polıtsııa organdyrynyń quqyqtyq negizderin, ustanymdaryn, mindetteri men júıesin anyq belgiledi.
Qazirgi tańda QR QK Áskerı polıtsııa bas basqarmasynyń bastyǵy - áskerı polıtsııa organdarynda tájirıbesi mol ofıtser Tımýr Dandybaev.
«Búginde áskerı polıtsııa organdarynda zamanaýı qarý-jaraq quraldary jáne áskerı tehnıkamen qamtamasyz etilgen tórt áskerı polıtsııa jasaǵy, 16 bólimi, 4 bólimshesi jáne Áskerı polıtsııa mamandaryn daıarlaıtyn ortalyǵy bar. Qoıylǵan mindetterdi sapaly oryndaý, áskerı polıtsııa qyzmetiniń tıimdiligin arttyrý maqsatynda áskerı polıtsııanyń uzaq merzimdi damý strategııasy jasaldy», - dedi polkovnık Dandybaev.
QR Qorǵanys mınıstrliginiń málimetinshe, áskerı polıtsısy qyzmetiniń negizgi eki baǵyty bar. Olar: quqyq qorǵaýshylyq jáne áskerı qyzmetteri. Quqyq qorǵaý qyzmetin júzege asyrý sheńberinde ákimshilik tájirıbesi bólimshesi men sybaılas jemqorlyqqa qarsy bólimsheler qurylǵan. Jańa baǵyt retinde dinı ekstremızmge qarsy jumystar qalyptasty.
Al áskerı baǵyttyń quramdas bóligi ol aıryqsha kezeńde Qarýly kúshteri júıesinde áskerı polıtsııanyń orny men rólin anyqtaý, sonymen qatar jol-komendant qyzmetin uıymdastyrý bolyp tabylady.
Áskerı polıtsııa organdarynda Qorǵanys mınıstrligi basshylyǵynyń erekshe tapsyrmasymen qyzmet etetin jedel áreket etý bólimi qurylǵan. Onyń quramyna arnaýly maqsattaǵy bólimsheler kiredi.
«Áskerı polıtsııa qyzmetiniń asa jarqyn kórsetkishi - ol 1990-shy jyldardyń sońynan bastap tirkelgen Qarýly kúshterde quqyq buzýshylyqtyń jyl saıynǵy orta eseppen 10-15 % tómendeýi.
Óziniń 15 jyl qyzmeti barysynda áskerı polıtsııanyń atqarǵan jumysy eleýli desek te bolady. Áskerı bólimder basshylyǵy jáne tárbıe qurylymdarymen birlese otyryp, áskerlerde quqyq buzýshylyqtyń sany aıtarlyqtaı tómendedi»,-delingen mınıstrliktiń málimetterinde.
