Áskerı polıtsııa basqarmasynyń bastyǵy 1 mln teńge para alyp jatqan jerinde ustaldy

TALDYQORǴAN. QazAqparat - Almaty aımaqtyq garnızonynyń áskerı polıtsııa basqarmasynyń bastyǵy para aldy dep kúdikke ilindi, dep habarlaıdy QazAqparat Sybaılas jemqorlyqqa qarsy is-qımyl agenttigine silteme jasap.

Almaty oblysynyń Sybaılas jemqorlyqqa qarsy qyzmeti sybaılas jemqorlyq qylmysyn jasady dep kúdiktelgen Almaty aımaqtyq garnızony áskerı polıtsııa otrıadynyń jedel áreket etý bóliminiń basshysyna qatysty sotqa deıingi tergeýdi bastady.

«Ol azamatty Almaty aımaqtyq garnızony áskerı polıtsııasyna jumysqa ornalastyrý jáne oǵan ári qaraı jalpy qamqorlyq jasaý úshin 1 mln teńge kóleminde para aldy dep aıyptalyp otyr» delingen habarlamada.

Kúdikti óz kinásin moıyndap, qorǵaýshysymen birge sotqa deıingi jedeldetilgen tergeý týraly ótinish hat berýine baılanysty qamalǵan joq.