Áskerı polıtseıler Armııa halyqaralyq oıyndaryna daıyndalýda

NUR-SULTAN. QazAqparat - QR Qarýly Kúshteri Áskerı polıtsııa bas basqarmasynyń komandasy bıyl Serbııada ótetin «Tártip saqshysy» baıqaýyna daıyndyqqa kiristi, dep habarlaıdy QazAqparat.

QR Qorǵanys mınıstrliginen málim etkendeı, daıyndyq «Spassk» oqý-jattyǵý polıgonynda ótýde. Komanda quramy 6 adamnan turady. Oǵan dene jáne atys daıarlyǵynan joǵary kórsetkishterimen erekshelengen áskerı polıtsııa qyzmetkerleri engen.

«Tártip saqshysy» baıqaýy tórt kezeńnen turady. Birinshi kezeńde áskerı qyzmetshiler avtomat pen pıstoletten atýdan jaryssa, ekinshide juptasyp patrýl júrgizý mashyqtaryn kórsetedi. Olar turǵyndary bar aýyldarda shartty qarsylasqa atyspen shabýyl jasap saıysady. Úshinshi «Patrýldi narıad» kezeńinde atys, medıtsınalyq daıyndyq, radıatsııalyq, hımııalyq, bıologııalyq qorǵanys jáne granatany dáldep laqtyrý normatıvterin oryndaıdy. Oǵan ekstermaldy elementter arqyly patrýldik avtokólikti júrgize otyryp, quqyq buzýshynyń shabýylyn toıtarý, ustaý kiredi.

«Eń qıyny jáne sońǵy sheshýshi kezeń – «Júgirý» kezeńi. Munda uzyndyǵy 12 shaqyrymǵa sozylǵan tas joldaǵy tabıǵı jáne jasandy kedergilerdi eńserý qajet», – dedi komanda jattyqtyrýshysy polkovnık Vıtalıı Fedorov.

Alǵash ret «Tártip saqshysy» baıqaýy 2017 jyly Armııa halyqaralyq oıyndary aıasynda ótkizilip, bizdiń komanda ekinshi oryn alǵan bolatyn.