Áskerı pılottar ushýdyń jańa ádisin meńgerýde - VIDEO

ASTANA. 9 jeltoqsan. QazAqparat - Áskerı-tasymaldaý avıatsııasynyń ushqyshtary ushýdyń jańa ádisin mashyqtaý ústinde. Arnaıy jattyǵý ınfraqyzyl qondyrǵylardyń kómegimen táýliktiń túngi ýaqytynda ushýdy kózdep otyr. Bul - jerdegi qarsylasqa kóktegi áýe kemesin kórsetpeýdiń bir tásili. Qazaqstandyq áskerıler osy jyldyń basynda ǵana alynǵan jańa S-295 áskerı-tasymaldaý ushaǵynda jattyǵyp júr. Bul týraly QR Qorǵanys mınıstrliginiń baspasóz qyzmetinen habarlandy.

Osyǵan deıin áskerı-tasymaldaý avıatsııasynyń ushqyshtary úshin túnde ushý kúrdeli másele bolyp kelgen edi. Elimizge bıyl ǵana kelgen bortyna adam men mańyzdy júkterdi alyp júretin S-295 ushaǵynyń jıyntyǵynda arnaıy ınfraqyzyl qondyrǵylar bar eken. Dál osy qondyrǵynyń kómegimen, endi áýe-kemesi syrtqy jaryqtaryn jaqpaı-aq, tas qarańǵyda ushyp-qona alatyn boldy. Aspandaǵy bul nysan jerdegi qarsylasqa kórinbegenimen, ushqysh jerdeginiń barlyǵyn kórip otyrady.

Qazirgi tańda S-295 ushaǵynda jumys jasaýǵa eki ekıpaj tolyǵymen daıyn. Al budan keıin jyl saıyn taǵy bir ushaq qosylyp otyrady. Bas-aıaǵy elimizde osyndaı 8 ushaq bolýy tıis.