Áskerı paradtyń alǵashqy bólimin «Jas ulan» sarbazdary bastady
ASTANA. QazAqparat - Astanada «Qazaq Eli» monýmenti alańynda QR Prezıdenti - Joǵarǵy Bas Qolbasshy Nursultan Nazarbaevtyń qatysýymen Otan qorǵaýshylar kúnine jáne Uly Otan soǵysyndaǵy Jeńistiń 70 jyldyǵyna arnalǵan áskerı sherý ótýde. Sharanyń alǵashqy bóliminde jeke quramnyń sherý toptary alańdy boılaı júrip ótti.
Alǵashqy lekte júrip ótken «Jas ulan» sarbazdarynan keıin soǵys ýaqytynyń áskerı formasyn kıgen jáne qarýyn asynǵan jaıaý sherý toptary ótti. Jıylǵan jurt Uly Otan soǵysyndaǵy ańyz qarý atalǵan «Maksım» pýlemetterin óz kózderimen tamashalady. Odan keıin QR Qarýly Kúshteriniń qazirgi zamanǵy paradtyq esep toby kórindi. Іzin ala Qorǵanys mınıstrliginiń esep toby alańdy boılaı júrdi.
Qurlyq áskerleri ofıtserleriniń paradtyq esebi saltanatty sherýmen ótti. Qurlyq áskerleri - armııamyzdyń negizgi ekpindi kúshi. Qarýly kúshterdiń bul túri sany jaǵynan eń úlken jáne jaýyngerlik mindetterdiń keń aýqymyn atqaratyn mańyzdy bóligi.
Áýe qorǵanysy kúshteriniń paradtyq esebi kelesi lekte shyqty. Olardyń negizgi maqsaty - Otanymyzdyń aspanynan tóngen qaýiptiń betin alý, áskerı nysandarymyzdy áýe shabýylynan qorǵaý, basqa da qarýly kúshterge áýeden qoldaý kórsetý.
Saltanatty sherýdi Áskerı teńiz kúshteriniń paradtyq esep toby jalǵastyrdy. Olar elimizdiń teńiz shebindegi qaýipsizdigin qamtamasyz etedi.
Alań ortalyǵyna Aeromobıldi áskerdiń sherý toby shyqty. Aeromobıldi áskerler Qarýly kúshterdiń Joǵarǵy Bas qolbasshynyń rezervi bolyp tabylady. Desantshy-áskerler eń qıyn tapsyrmalardy oryndaı alady.
