Áskerı paradtyń jaıaý sherýin Memlekettik kúzet rotasy túıindedi

ASTANA. KAZINFORM – Memlekettiń kúzet qyzmetiniń rotasyn Táýelsizdik alańyna «Aıbyn» prezıdenttik polkiniń komandıri polkovnık Erlan Ǵaısa bastap shyqty.

«Memlekettik kúzet qyzmeti týraly» Zań boıynsha bul qurylym myna laýazymdy tulǵalardyń qaýipsizdigine jaýapty:

1) QR Prezıdenti;

2) QR Parlamenti Senatynyń tóraǵasy;

3) QR Parlamenti Májilisiniń tóraǵasy;

4) QR Premer-mınıstri;

5) Respýblıka Prezıdentiniń zaıyby (jubaıy) jáne Prezıdentpen birge turatyn basqa da otbasy músheleri;

6) QR Eks-Prezıdenti;

7) QR Prezıdenti bekitetin tizbege kirgen Qazaqstan Respýblıkasynyń laýazymdy adamdary;

8) Qazaqstanǵa saparlaı kelgen shet memleketterdiń basshylary, shet elderdiń parlamenti men úkimet basshylary;

9) Qazaqstanǵa saparlaı kelgen halyqaralyq uıymdardyń basshylary men shet memleketterdiń ózge de adamdary (QR Prezıdentiniń nemese onyń tapsyrýymen Prezıdenti Ákimshiligi Basshysynyń ókimderi negizinde).

Sondaı-aq, bul jasaq Memlekettik Tý men Eltańba etalondarynda qurmetti qaraýyl atqarady.

Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan. 

Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysyp otyr. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qosty.