Áskerı paradqa qatysqan jaýyngerler Máskeýden oraldy
ASTANA. KAZINFORM — Keńes Odaǵynyń Batyry general-maıor Ivan Panfılov atyndaǵy Desanttyq-shabýyldaý áskerleriniń 37-shi brıgadasynyń 80 áskerı qyzmetshisi Qazaqstan Respýblıkasy Qarýly Kúshteriniń Áýe qorǵanysy kúshterine tıesili ushaǵymen Taldyqorǵan qalasyna oraldy. Bul týraly Qorǵanys mınıstrligi málim etti.
Toǵyzynshy mamyr kúni qazaqstandyq desantshylar Qyzyl alańmen saltanatty sherýmen ótip, búkil adamzattyń beıbitshiligi men azattyǵy jolynda kúresip, qaza tapqan jaýyngerler men kózi tiri ardagerlerge taǵzym etti.
– Máskeýdegi saltanatty sherýge qatysý – men úshin zor mártebe. Burynǵy jyldary Qyzyl alańnan sarbazdar maıdanǵa attanǵan. Eń aýyr soǵysta olar rýhynyń kúshi men otansúıgishtiginiń arqasynda jeńiske jetti. Jeńis úshin ómirin qıǵan jandardyń rýhyna taǵzym etý múmkindigi buıyrǵanyna maqtanamyn, – dep paradqa qatysqan aǵa leıtenant Erzat Qosyn óz áserimen bólisti.
Eske sala keteıik, keshe Memleket basshysy Qyzyl alańdaǵy paradqa qatysqan Qazaqstan Qarýly Kúshteriniń sarbazdaryna qurmet kórsetken bolatyn.