Áskerı parad: Táýelsiz Qazaqstan armııasynyń búgingi kúsh aıbyny kórsetiledi
ASTANA. KAZINFORM — Búgingi áskerı sherý mazmundyq turǵydan eki bólikten turady, ıaǵnı tarıhı jáne zamanaýı baǵyttardy qamtıdy.
Tarıhı bóliginde Jeńistiń 80 jyldyǵynda aǵa býyn batyrlarymyzdyń erligine qurmet kórsetiledi. Zamanaýı bóliginde Táýelsiz Qazaqstan armııasynyń búgingi kúsh aıbyny kórsetiledi. Saltanatty is-sharaǵa Qazaqstan Qarýly kúshteriniń barlyq túrlerinen 4 000-nan astam áskerı qyzmetshi, 200-den astam áskerı tehnıka men qarý-jaraq, sondaı-aq maıdandyq, armııalyq jáne áskerı-kóliktik avıatsııanyń 66 ushaǵy men tikushaǵy jumyldyrylyp otyr. Onyń ishinde buǵan deıingi paradtarda bolmaǵan zenıtti zymyran keshenderi, robottyń kómegimen júretin sý jańa áskerı tehnıkany tamashalaý múmkindigi bolady.
Áskerı paradty QR Qarýly kúshteri Qurlyq áskerleriniń bas qolbasshysy general-moıor Mereke Kóshekbaev basqarady.
Parad kezinde alańǵa Qazaqstan Respýblıkasy Memlekettik kúzet qyzmetiniń toby Memlekettik Týdy alyp keldi. Týdy Memlekettik kúzet qyzmetiniń qurmet qaraýyl rotasy bólimshesiniń komandıri serjant Ashat Maqsatuly saltanatty ustap keledi. Top bastyǵy — Memlekettik kúzet qyzmeti «Aıbyn» prezıdenttik polki qurmet qaraýyl rotasynyń bastyǵy podpolkovnık Qaırat Moldabaev.
Aıta keteıik, Memlekettik Týmen birge alańda Jeńis Týy jelbireıdi. Bul osydan 80 jyl buryn áıgili otandasymyz Raqymjan Qoshqarbaev pen onyń maıdandasy Grıgorıı Býlatov Reıhstagqa tikken týdyń kóshirmesi.
Eske salsaq, 2024 jyly qarashada Mereke Kóshekbaev QR Qarýly Kúshteri Qurlyq áskerleriniń bas qolbasshysy laýazymyna taǵaıyndaldy.
Budan buryn habarlanǵandaı, elordadaǵy «Qazaq Eli» alańynda Memleket basshysy — Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaevtyń qatysýymen Uly Jeńistiń 80 jyldyǵyna arnalǵan áskerı parad bastaldy.
Osyǵan deıin QR Qarýly Kúshteriniń Áskerı-tarıhı mýzeıinde 1945 jyldyń mamyrynda Reıhstagqa tigilgen Jeńis týynyń kóshirmesi saqtaýly turǵanyn jazǵan edik.