Áskerı parad: Kezek ІІM-niń elıtalyq jedel jasaǵyna jetti
ASTANA. KAZINFORM – Іshki ister mınıstrliginiń jedel den qoıýǵa arnalǵan jasaǵy Jeńistiń 80 jyldyǵyna arnalǵan áskerı paradtyń aıbynyn asyrýǵa shyqty.
Bylaıǵy jurt bulardy orysshadan qysqartyp «SOBR» dep ataıdy. ІІM-niń arnaıy maqsattaǵy bólimshelerin otqa salsa janbaıtyn, sýǵa salsa batpaıtyn elıtalyq jasaq dese jarasady. Asa kúrdeli tapsyrmalardy oryndaýǵa mashyqtanǵan bul áskerıler ekstremıstik, terrorıstik kórinisterge qarsy áreket etip, tosqaýyl qoıýǵa mindettelgen. Mádenı-buqaralyq jáne aýqymdy arnaıy is-sharalarda bular da tártipti qadaǵalaıdy. Bul topty ІІM arnaıy jáne jumyldyrý daıyndyǵy departamentiniń bastyǵy, polıtsııa general-maıory Sabyr Júsipbekov bastap ótti.
Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan.
Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysyp otyr. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qosty.