Áskerı parad boıynsha alǵa qoıǵan maqsat oryndaldy — Mereke Kóshekbaev

ASTANA. KAZINFORM — Búgin áskerı paradty basqarǵan QR Qarýly kúshteri Qurlyq áskerleriniń bas qolbasshysy general-moıor Mereke Kóshekbaev áskerı sherý jospardaǵydaı ótkenin aıtty.

— Osy kúnge deıin tııanaqty oqý-jattyǵý bolǵanyn bilesizder. Jeke ózim óte jaqsy dep baǵalaımyn… Barlyǵy jospardaǵydaı júzege asty. Alǵa qoıǵan maqsat oryndaldy dep esepteımin. Sonymen qatar, halyq ta óziniń baǵasyn bere jatar. Atap aıtqanda, áskerı tártip pen jospar boıynsha bári oıdaǵydaı ótti, — dedi M. Kóshekbaev áskerı paradtan keıin tilshiler suraǵyna jaýap bere otyryp.

Qurlyq áskerleriniń bas qolbasshysynyń paıymynsha, osy áskerı aýqymdy is-sharalar jas óskeleń urpaqtyń tárbıesine, patrıottyq sezimge oń áserin tıgizedi.  Sonymen qatar ol elordadaǵy áskerı sherýge jumyldyrylǵan jaýyngerler búginnen bastap óńirlerdegi bólimshelerine qaraı baǵyt alatynyn aıtty.

Budan buryn habarlanǵandaı, elordadaǵy «Qazaq Eli» alańynda Memleket basshysy — Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaevtyń qatysýymen Uly Jeńistiń 80 jyldyǵyna arnalǵan áskerı parad ótti. 

Búgingi áskerı sherý mazmundyq turǵydan eki bólikten turdy, ıaǵnı tarıhı jáne zamanaýı baǵyttardy qamtydy.