Áskerı parad: Ardagerler óskeleń urpaqqa aq batasyn berdi

ASTANA. KAZINFORM — Uly Jeńistiń 80 jyldyǵyna arnalǵan elordadaǵy áskerı paradqa arnaıy kelgen qart maıdangerler óskeleń urpaqqa batasyn berdi.

Atap aıtqanda, qazir el aýmaǵynda 105 soǵys ardageri bar. Olar 80 jyldan beri beıbitshiliktiń qadir-qasıetin qazirgi urpaqqa aıtyp, túsindirip keledi. Osy oraıda búgingi áskerı paradqa 6 soǵys ardageri arnaıy kelip, qatysty. Olardyń arasynda Astana qalasynan Rzaǵul Baıkeshev, Almaty qalasynan Vladımır Belozerov, Qosshy qalasynan Nurqasym Ájitaev, Qostanaı qalasynan Qasymhan Aldabergenov, Óskemen qalasynan Qurmat Rahımov, Qaraǵandy qalasynan Grıgorıı Stepenko bar. 

100 jastaǵy Qasymhan Aldabergenov búgingi áskerı sherýdiń mańyzdylyǵy jaıyndy pikir bildirdi.

— Jeńistiń 80 jyldyǵyna arnalǵan osynaý is-sharaǵa erekshe mán berilip otyr. Memleket basshysy Qasym-Jomart Toqaev beıbitshiliktiń baǵa jetpes baılyq ekenin atap ótti. Osyny óskeleń urpaq túsinýi kerek. Búgingi paradta batyr babalardyń esimderi ataldy. Ekinshi dúnıejúzilik soǵys barshamyz úshin aýyr synaq boldy. Sondyqtan elimiz, jerimiz aman bolsyn! Men sııaqty ǵumyrly bolyp, 100 jasańdar. Elimiz órkendeı bersin! — dedi Q. Aldabergenov.

Sonymen qatar ardager Vladımır Belozerov osyndaı aýqymdy is-sharaǵa qatysý úshin Almatydan kelgenine qýanyp otyrǵanyn aıtty. 

— Jaqynda 100 jasqa tolamyn. Mundaı aýqymdy sherýdi ómirimde kórmeppin. Búgin qatty shabyttanyp, ózimdi bıikte turǵandaı sezindim. Áskerı paradta elimizdiń qýatyn tamashaladyq. Sondyqtan osyndaı paradqa taǵy da qatysqym keledi, — dedi V. Belozerov.

Eske salsaq, bıyl aqpan aıynda Ulttyq ulan sarbazdary 101 jastaǵy ardager Rzaǵul Baıkeshevti arnaıy quttyqtaǵan edi.