Áskerı orkestrlerdiń «Beıbitshilik kerneıi» festıvali plats-kontsertpen aıaqtaldy

ASTANA. QazAqparat - Búgin «Astana Opera» memlekettik opera jáne balet teatrynyń aldyndaǵy alańda ShYU qatysýshy memleketteri qorǵanys mınıstrleriniń keńesi aıasynda «Beıbitshilik kerneıi» festıvaliniń ǵalamat plats-kontserti ótti. Bul týraly QR Qorǵanys mınıstrliginiń baspasóz qyzmeti habarlady.

ShYU elderi áskerı úrmeli orkestrleriniń «Beıbitshilik kerneıi» úshinshi halyqaralyq festıvaline qatysýshylar qazaqtyń ulttyq áýenderine mán berdi. «Biz kontserttik baǵdarlama jáne plats-kontsert túrinde óner kórsettik. Biz úshin bul festıval ózimizdiń mádenıetimizdi kórsetip qana qoımaı, sonymen birge tájirıbe bólisý úshin jaqsy múmkindik. Álbette, ózge eldiń sahnasynda árbir orkestrdiń óz ónerlerin ortaǵa salýy óte jaýapty is. Bıyl biz «Qara jorǵa» bıin alyp keldik. Qazaqstan men Qyrǵyz eliniń halqy bul ánge bı bıleıdi. Biz bul nómirdi plats-kontsertimizge qosyp,  osylaısha, bizdiń halyqtarymyzdyń baýyrlastyǵy máńgi ekendigin kórsetkimiz keldi», - dedi Qyrǵyz Respýblıkasy Qarýly kúshteri Bas shtaby Armııa ortalyq úıi áskerı  orkestriniń bastyǵy, kapıtan Dastan Jumataı ýýlý. «Orkestrlerdiń daıyndyq deńgeıi óte jaqsy. Has sheberlikterine sóz joq. Osy festıvalǵa josparlanǵan barlyq dúnıeni oryndap shyqtyq.  Biz - halyqaralyq festıvaldarǵa únemi qatysyp turamyz. Qazaqstannyń atyn shyǵaryp, joǵary deńgeıdi kórsetemiz. Osy jyly barlyq kúsh-jigerimiz atalmysh festıvalǵa daıyndalýǵa baǵyttaldy. Sondaı-aq «Máskeýde ótetin Spassk munarasy» festıvaline qatysýdy josparlap otyrmyz», - dep QR QK UÁPO Ortalyq áskerı orkestriniń bastyǵy, aǵa leıtenant Almas Ibragımov.

ShYU qatysýshy elderi áskerı mýzykanttarynyń ǵalamat baıqaýyna Qyrǵyz, Qytaı, Reseı, Tájikstan men Qazaqstannyń áskerı orkestrleri qatysty.