Áskerı oqý-jattyǵý kezinde aman qalǵan bir top áskerı qyzmetshi «Erligi úshin» medalimen marapattaldy
ASTANA. KAZINFORM — Memleket basshysynyń Jarlyǵymen áskerı boryshyn atqarý ústinde kórsetken erligi men janqııarlyǵy úshin bir top áskerı qyzmetshi «Erligi úshin» medalimen marapattaldy. Bul týraly Aqorda málim etti.
Qýandyq Beket Baqtybekuly – 29011 áskerı bóliminiń matrosy (atqyshy);
Temirhan Aqjol Tımýruly – 29011 áskerı bóliminiń matrosy (atqyshy);
Ýdalov Nıkıta Aleksandrovıch – 29011 áskerı bóliminiń mamany (sanıtarııalyq nusqaýshysy).
Buǵan deıin Memleket basshysynyń Jarlyǵymen áskerı boryshyn atqarý ústinde kórsetken erligi men janqııarlyǵy úshin Mańǵystaý oblysyndaǵy oqý-jattyǵý jıyny kezinde qaza tapqan áskerı qyzmetshiler Qazaqstan Respýblıkasynyń memlekettik nagradalarymen marapattalǵan bolatyn.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
25 qyrkúıekte, saǵat 9:15 shamasynda úzdiksiz júrgizilgen izdestirý-qutqarý jumystary nátıjesinde eki sarbazdyń denesi sýdan shyǵaryldy. Osylaısha teńiz-áskerı kúshteriniń 14 áskerı qyzmetshisi qaza boldy.
Prezıdent Qorǵanys mınıstrligindegi jaǵdaıdy tekseretin komıssııa qurǵan edi. Komıssııa júrgizilgen jumystyń alǵashqy nátıjeleri týraly jeti kún ishinde baıandaýǵa tıis.
Qyzmetke salǵyrt qarady, korabl júrgizý qaǵıdalaryn buzý boıynsha aýyr zardaptarǵa ákep soqqan qylmystyq quqyq buzýshylyqtar jasady degen kúdikpen Qazaqstan Respýblıkasy Qarýly Kúshteriniń joǵary jáne aǵa komandalyq quramyndaǵy jaýapty laýazymdy tulǵalar ustalǵan bolatyn.
26 qyrkúıekte Mańǵystaý jurty qaza tapqan sarbazdardy sońǵy saparǵa shyǵaryp saldy.
Al búgin Prezıdent Dáýren Qosanovty Qorǵanys mınıstri laýazymynan bosatty.
