Áskerı oqý oryndarynda temirdeı tártipti uıymdastyrý mańyzdy - Erlan Saırov
«Bizdiń Qarýly kúshterde eki problema bar, ıaǵnı qatardaǵy jaýyngerlerdiń zábir kórýi, áskerdiń el aldynda bedeliniń tómendeýi baıqalyp otyr. Bul - memleketti qorǵaý salasyndaǵy júıeli problema. Azamattar, ásker ókilderi bul máseleni birigip sheshýi qajet. Elimizdegi áskerı-patrıottyq tárbıeni qaıta qaraý óte mańyzdy. Áskerı-patrıottyq tárbıe barysynda Otan qorǵaý mıssııasyna pozıtıvti emotsıonaldyq, kúsh-jigerlik sezim, Otan qorǵaýdyń mańyzy jóninde jas jetkinshekterge tereń aqparat berý kerek», - dedi E. Saırov Úkimet basshysynyń orynbasary Eraly Toǵjanovtyń atyna joldaǵan saýalynda.
Osy oraıda depýtat «AMANAT» fraktsııasynyń tıisti usynystaryn jarııalady.
«Kóptegen ǵalymdar «Qobylandy batyr», «Alpamys batyr», «Qambar batyr», «Er Tarǵyn» sııaqty batyrlar jyrynda el táýelsizdigin syrtqy jaýlardan qorǵaý saryny ústem dep atap ótedi. Balalyq shaqtan batyrlar jyryn, patrıottyq sezimdi ardaqtap, batyrlyqty madaqtaǵan, aqyldylyq, parasattylyq, dostyq tárizdi adamgershilik ıgi qasıetterdi dáripteıtin mektepke deıin, mektep kezeńindegi baǵdarlama qajet», - dedi ol.
Sonymen qatar E. Saırov memlekettik til uttyq órleýdiń ajyramas bóligi ekendigi jónindegi uǵym mektepke deıin, mektep baǵdarlamasynyń ózegi bolýy tıis ekenin atap ótti.
«Beıbit kúndegi qatal tártipke qazirgi tehnologııa zamanyndaǵy jas býynnyń boıy úırenbeı jatyr. Sondyqtan áskerı patrıotıkaǵa jańa motıvatsııanyń tásilin oılastyrý kerek. Qarýly kúshter quramynda áskerı - patrıottyq jumysty júıeli túrde nyǵaıtyp, jańa tehnologııalar eńgizý qajet. Áskerı oqý oryndarynda temirdeı tártippen qatar, adamgershilik, baýyrmaldyq kýrstaryn uıymdastyrý mańyzdy. Adamnyń taǵdyryn tikeleı sheshetin komandırler joǵary moraldyq-psıhologııalyq dárejege ıe bolýy tıis», - dedi depýtat.
