Áskerı oqý oryndaryna qabyldanýǵa úmitkerlerge qoıylatyn jańa talaptar qaraldy - Qorǵanys mınıstrligi

ASTANA. QazAqparat - 11 aqpanda QR QK Qurlyq áskerleriniń Áskerı keńesi bolyp ótti. Áskerı keńes otyrysyna Qurlyq áskerleri bas qolbasshysynyń orynbasarlary, óńirlik qolbasshylyqtar áskerleriniń, ásker tekteriniń qolbasshylary Qurlyq áskerleri bas qolbasshysy basqarmasyndaǵy ásker tekteri men qyzmetterdiń bastyqtary qatysty.

Bul týraly Qorǵanys mınıstrliginiń baspasóz qyzmeti habarlady.

QR Qorǵanys mınıstriniń Qarýly Kúshterdi damytý jónindegi talaptary aıasynda jaýyngerlik ázirlikti qoldaý men áskerlerdiń jaýyngerlik jattyǵýlaryn ári qaraı jetildirýge erekshe kóńil bólindi. Áskerı keńes basty kúsh-jigerdi áskerlerdi halyqaralyq qaýipsizdikke tóngen qaýip-qaterge tótep berý úshin áskerı bólimder, bólimsheler, qurylymdyq bólimshelerdiń is júzindegi áreketterin jetildirýge baǵyttaý qajettigin belgilep berdi.

Sonymen qatar, áskerı keńes áskerı tártip pen quqyq tártibi máselesine de aıryqsha nazar aýdardy. Jańa Qylmystyq kodeksti qoldaný erekshelikterin eskere otyryp, Elbasy aıqyndap bergen «quqyq buzýshylyqqa nóldik tózimdilik» baǵdary erekshe oryn alatyn bolady. Al áskerı qyzmetshiler úshin qoldanystaǵy zańnama talaptaryna sáıkes ómir súrý kúndelikti tirshilik qalpyna aınalýy tıis.

Áskerı keńestiń kún tártibinde áskerı ýnıversıtetter, akademııalarǵa kandıdattardy iriktep jiberý máselesi jáne áskerı qyzmetshilerdi Qorǵanys mınıstrligi men memleket basshylyǵynyń kótermeleýine usyný máseleleri qaraldy. Alqa músheleri ár kandıdatty jeke qarastyryp, olardyń qabiletteri, qyzmettik tájirıbesi men sińirgen eńbegin eskerdi.

Sonymen qatar, Áskerı keńes Qurlyq áskerleriniń ári qaraı damý baǵyttaryn, aýqymdy oqý-jattyǵýlarǵa bólinetin qarajat, jumyldyrylatyn kúshter men merzimderin, Uly Jeńistiń 70 jyldyǵyna arnalǵan áskerı paradqa qatysatyn Qurlyq áskerleriniń toptaryn daıarlaý tártibin naqtylady.