Áskerı oqý oryndarynda zamanaýı soǵys talaptaryna saı mamandar daıarlanyp jatyr

ASTANA. KAZINFORM – QR Prezıdenti janyndaǵy «Ortalyq kommýnıkatsııalar qyzmeti» alańynda ótken baspasóz konferentsııasynda QR Qorǵanys mınıstrligi Áskerı bilim jáne ǵylym departamentiniń bastyǵy polkovnık Murat Oljabaev elimizdiń áskerı bilim berý júıesindegi jańashyldyqtar men kadr daıarlaý baǵyttary týraly aıtyp berdi.

– Eń aldymen Qorǵanys mınıstrliginiń bilim berý uıymdarynda bilikti áskerı mamandardy daıarlaý máselelerine toqtalǵym keledi. Qazaqstan Respýblıkasynyń Áskerı doktrınasynyń erejelerine sáıkes, Qarýly Kúshterdi, ózge áskerler men áskerı qurylymdardy joǵary kásibı kadrlarmen qamtamasyz etýge baǵyttalǵan áskerı bilim berýdiń tutas júıesi qalyptastyryldy. Bul júıe soǵys isiniń damý perspektıvalarymen, áskerı qurylys mindetterimen ózara sabaqtas jáne jańa býyndaǵy soǵystardyń boljamdy sıpatyn eskeredi, – dedi polkovnık Murat Oljabaev.

Onyń aıtýynsha, qazirgi ýaqytta Qorǵanys mınıstrliginiń áskerı bilim berý qurylymyna ártúrli deńgeıdegi toǵyz áskerı oqý orny kiredi.

– Ofıtserlerdi joǵary jáne joǵary oqý ornynan keıingi bilim berý baǵdarlamalary boıynsha daıarlaý úsh áskerı ınstıtýtta jáne QR Ulttyq qorǵanys ýnıversıtetinde júzege asyrylady. Al tehnıkalyq jáne kásiptik bilim berýmen serjanttardy daıarlaý Qorǵanys mınıstrliginiń bes áskerı kolledjiniń bazasynda júrgiziledi, – dep atap ótti spıker.

Polkovnıktyń aıtýynsha, áskerı bilim berýdiń ózegi joǵary bilim berý baǵdarlamalary boıynsha áskerı mamandardy daıarlaý.

– Ofıtserlik kadrlardy daıarlaý Qarýly Kúshterdiń barlyq ásker tekteri men túrleriniń negizgi mamandyqtaryn qamtıdy jáne úsh áskerı ınstıtýtta júzege asyrylady. Atap aıtqanda, Qurlyq áskerleri áskerı ınstıtýtynda – 6 mamandyq, 17 biliktilik, Áýe qorǵanysy kúshteri áskerı ınstıtýtynda – 7 mamandyq, 14 biliktilik, al Radıoelektronıka jáne baılanys áskerı-ınjenerlik ınstıtýtynda – 7 mamandyq, 12 biliktilik boıynsha daıarlyq júrgiziledi, – dedi ol.

Murat Oljabaevtyń sózinshe, oqý protsesi Qarýly Kúshterdiń jaýyngerlik daıarlyq josparymen tyǵyz baılanysta júrgiziledi.

– Kýrsanttar men tyńdaýshylar «jaýyngerlik yntymaqtastyq», «Aıbalta», «Qarataý», «ózara is-qımyl» sııaqty iri oqý-jattyǵýlarǵa qatysady. Bul olardyń keıingi qyzmetinde qajet bolatyn praktıkalyq daǵdylardy qalyptastyrýǵa múmkindik beredi, – dedi departament bastyǵy.

Sondaı-aq qazirgi soǵystardyń sıpatynyń ózgerýine jáne áskerlerdiń qajettilikterine sáıkes, ofıtserlerdi jańa baǵyttar boıynsha daıarlaý bastalǵan.

– Qurlyq áskerleri áskerı ınstıtýtynda materıaldyq-tehnıkalyq qamtamasyz etý kafedrasy ashyldy. Áýe qorǵanysy kúshteri áskerı ınstıtýtynda ushqyshsyz ushý apparattaryn basqarý mamandyǵy boıynsha daıarlaý jolǵa qoıyldy. Al Radıoelektronıka jáne baılanys áskerı-ınjenerlik ınstıtýtynda radıoelektrondyq barlaý men kúres, aqparatty qorǵaý, krıptologııa, sondaı-aq aýdarma isi jáne avtomattandyrylǵan basqarý júıeleri baǵyttary boıynsha mamandar daıarlanady, – dep túıindedi Murat Oljabaev.

Buǵan deıin Qazaqstanda áskerge shaqyrylýshylardy esepke alý qaǵıdasy ózgergenin jazǵanbyz.