Áskerı mindettiler sý tasqynymen kúreske jumyldyrylýy múmkin
NUR-SULTAN. QazAqpart - Áskerı mindettiler sý tasqynymen kúreske jumyldyrylýy múmkin. Bul týraly QR ІІM Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.
«Qajettiniń barlyǵy - tehnıka da, adam da bar jáne olar jumys istep jatyr. Nur-Sultan qalasynyń irgesindegi Talapker eldi mekenin de qaperden shyǵarǵan joqpyz. Talapker de, barlyq eldi meken de baqylaýda tur», - dedi komıtet tóraǵasy onlaın brıfıng barysynda BAQ ókilderiniń saýalyna oraı.
Sonymen qatar, ol arnaýly jıynǵa shaqyrylǵan áskerı mindettiler de qajet bolǵan jaǵdaıda sý tasqynymen kúres jumystaryna jumyldyrylýy múmkin ekendigin jasyrmady.
«Eger mundaı qajettilik týyndaıtyn bolsa, árıne, biz olardyda jumyldyratyn bolamyz. Ázirshe onyń qajettiligi bolmaı tur. Ózimizdiń de qolymyzdan kelip jatyr. Jergilikti atqarýshy organdar, azamattyq qorǵanys organdarynyń bólimsheleri, Ulttyq ulan bar», - dedi Vladımır Bekker.
Esterińizge sala ketsek, keshe Qazaqstan Prezıdenti áskerı mindettilerdi arnaýly jıynǵa shaqyrý týraly Jarlyq shyǵarǵan bolatyn.
