Áskerı medıtsınanyń ardageri «Qazaqstannyń eńbek sińirgen dárigeri» ataǵyn aldy
ASTANA. KAZINFORM — Áskerı medıtsınanyń ardagerine tósbelgi men qurmetti ataq kýáligin Densaýlyq saqtaý mınıstri Aqmaral Álnazarova tabys etti, dep habarlaıdy Qorǵanys mınıstrliginiń baspasóz qyzmeti.
— Medıtsına qyzmetkeri kúnine oraı densaýlyq saqtaý salasyndaǵy joǵary jetistikteri men eren eńbegi úshin QR Qorǵanys mınıstrligi Áskerı klınıkalyq gospıtaliniń dárigeri otstavkadaǵy medıtsına qyzmetiniń polkovnıgi Vıktor Mılıýtınge Prezıdent Jarlyǵymen «Qazaqstannyń eńbek sińirgen dárigeri» qurmetti ataǵy berildi, — delingen habarlamada.
Vıktor Ivanovıchtiń minsiz dárigerlik qyzmettegi jalpy eńbek ótili 55 jyldan asady.
Saratov medıtsına ınstıtýtynyń áskerı-medıtsına fakýltetin támamdaǵan ol avıatsııalyq komendatýra dárigerinen bastap Qazaqstan Áskerı-áýe kúshteri medıtsına qyzmetiniń bastyǵyna deıingi qyzmet jolynan ótti. Ótken ǵasyrdyń 70-jyldarynda Afrıka elderi men Arabııa túbegindegi memleketterde jaýapty mindetter atqaryp, joǵary kásibıligin, janqııarlyǵyn jáne dárigerlik boryshyna adaldyǵyn kórsetti.
Onyń bastamasymen Qazaqstanda biregeı TBRk-73 vakýýmdyq barokamerasy paıdalanýǵa berildi. Bul jabdyq ushý quramynyń bıiktik synaqtaryn júıeli túrde ótkizýge jáne ushý qaýipsizdigin arttyrýǵa múmkindik berdi. Vıktor Mılıýtın — halyqaralyq mamandandyrylǵan basylymdarda jaryq kórgen 20-dan astam ǵylymı eńbektiń avtory.
Búginde ol QR Qorǵanys mınıstrliginiń Áskerı klınıkalyq gospıtalindegi dárigerlik-ushý saraptamasy bólimshesiniń barokamera dárigeri retinde eńbek jolyn jalǵastyryp keledi.
Qurmetti ataqtyń berilýi Vıktor Mılıýtınniń kópjyldyq adal eńbegine, áskerı medıtsınany, medıtsına ǵylymyn damytýǵa jáne Qazaqstan áskerı avıatsııasynyń ushý qaýipsizdigin qamtamasyz etýge qosqan eleýli úlesine berilgen joǵary baǵa boldy.
Buǵan deıin Kazinform tilshisi medıtsına salasy mamandaryna kórsetilip jatqan qoldaýǵa toqtaldy.
