Áskerı-medıtsınalyq qyzmet kórsetý erejeleri ózgerdi

Atap aıtqsaq, áskerı qyzmetshilerge áskerı-medıtsınalyq mekemelerde (medıtsınalyq bólimshelerde) medıtsınalyq qamtamasyz etý bıýdjet qarajaty esebinen júzege asyrylatyny jóninde jańa tarmaq engizildi.

Statsıonarlyq jaǵdaılarda medıtsınalyq kómekti kórsetý, medıtsınalyq tekserýler júrgizý, sanıtarııalyq-epıdemıologııalyq salaýattylyqty qamtamasyz etý, áskerı-dárigerlik saraptama júrgizý áskerı-medıtsınalyq mekemeler (medıtsınalyq bólimsheler) arqyly, sonyń ishinde basqa densaýlyq saqtaý uıymdarynan medıtsınalyq qyzmetterdi satyp alý arqyly da júzege asyrylady.

Ambýlatorııalyq jaǵdaıda medıtsınalyq kómek kórsetý áskerı-medıtsınalyq mekemelerde (medıtsınalyq bólimshelerde) basqa densaýlyq saqtaý uıymdarynan qyzmet satyp almaı-aq júzege asyrylady.

Eger áskerı-medıtsınalyq mekemede tıisti bólimder, mamandar nemese arnaıy jabdyqtar bolmasa, áskerı qyzmetshi ózi tirkelgen jeri boıynsha bastapqy medıtsınalyq-sanıtarııalyq kómek kórsetetin densaýlyq saqtaý uıymyna jiberiledi.

Sondaı-aq parashıýtpen sekirý kezindegi medıtsınalyq qamtamasyz etý mynalardy qamtıdy:

• áskerı qyzmetshilerdiń parashıýtpen sekirýge jaramdylyǵyn anyqtaý úshin áskerı-dárigerlik saraptama qaǵıdalaryna sáıkes medıtsınalyq tekserýden ótkizý; 

• jerdegi daıyndyq sabaqtaryn ótkizý barysynda medıtsınalyq baqylaýǵa qatysý: qural-jabdyqtardyń, trenajerlerdiń, ushaq maketteriniń, aspaly júıelerge arnalǵan stendterdiń, parashıýttik tramplınderdiń jaramdylyǵy, sabaq jetekshileriniń bolýy, kúrdeli jattyǵýlar kezinde saqtandyrýdyń durystyǵyn tekserý; 

• jerge qoný alańyn baqylaýǵa qatysý: tereń shuńqyrdyń, aǵash túbiriniń, tastyń bolmaýy, qaýipsiz aımaqtyń bolýy, ǵımarattar, temirjoldar, elektr jelileri, iri sý qoımalary jáne basqa da qaýipti kedergilerden bos bolýy; 

• parashıýtpen sekirýdi medıtsınalyq qamtamasyz etý úshin kúshter men quraldardy daıyndaý, bólý jáne ornalastyrý; 

• sekirý aldynda medıtsınalyq tekserý júrgizý jáne densaýlyq jaǵdaıy boıynsha ruqsat berý, sondaı-aq sekirý aldynda ishek pen qýyqty bosatýdyń mańyzdylyǵyn túsindirý; 

• jazataıym jaǵdaılar kezinde medıtsınalyq kómek kórsetý jáne zardap shekkenderdi emdeý mekemesine evakýatsııalaý. 

Parashıýtpen sekirýdi medıtsınalyq qamtamasyz etý úshin quramynda dáriger, feldsheri (medıtsınalyq meıirger) bar sanıtarlyq avtokólikpen medıtsınalyq brıgada bólinedi. Ár sekirýden keıin jaraqattardy anyqtaý maqsatynda suraý jáne syrttaı tekserý júrgiziledi.

Parashıýtpen sekirýdi uıymdastyrý kezinde kezekshi dáriger men feldsher (meıirger) kelesi talaptardyń saqtalýyn tekseredi:

• tamaqtan keıin keminde bir saǵat ótken soń sekirýdi oryndaý; 

• sekirý aıaqtalǵannan keıin demalys berý; 

• klımattyq jáne aýa raıy jaǵdaılaryna sáıkes kıim men aıaq kıimniń sáıkestigi. 

Sondaı-aq statsıonarlyq jaǵdaıda áskerı-medıtsınalyq kómek shtattyq kerýetteri bar medıtsınalyq bólimshelerde, sondaı-aq medıtsınalyq qyzmetke lıtsenzııasy bar áskerı-medıtsınalyq mekemelerde kórsetiletini atap ótiledi. 

Eske salaıyq, buǵan deıin Qorǵanys mınıstri áskerı qyzmet qaýipsizdigi men tártipti kúsheıtýdi tapsyrǵan edi.