Áskerı mashınanyń shynjyr tabany astyna qulap, mert bolǵan jedel qyzmettegi sarbazdyń týystaryna 1 mln. teńge tólenedi - QR Qorǵanys mınıstrligi
Bul týraly QM baspasóz qyzmetinen habarlandy.
31 qańtarda tańerteń Qurlyq áskerleri áskerı ınstıtýtynyń kýrsattarymen birigip áskerı kólikti júrgizý boıynsha josparly jattyǵýdyń barysynda tótenshe jaǵdaı oryn aldy, onyń sońy jedel qyzmettegi sarbaz Ómirserik Dúısenbaevtyń ólimine ákep soqty. Oqys oqıǵa Almaty mańynda ornalasqan áskerı polıgondardyń birinde boldy.
Jattyǵý kezinde kýrsanttar áskerı mashınany júrgizý mashyqtaryn úırenip jatty, oqý úrdisiniń barysynda 19 jastaǵy júrgizýshi-mehanık Ómirserik Dúısenbaev kóliktiń shynjyr tabany astyna qulap ketti. Sarbaz alǵan jaraqatynan «jedel járdem» kelgenshe jantásilim etti.
Zańnamaǵa sáıkes, marqum bolǵan Ómirserik Dúısenbaevtyń ata-anasyna 1 mln. teńge mólsherinde ótemaqy tólenetin bolady. Qurlyq áskerleri áskerı ınstıtýtynyń basshylyǵy jerleý rásimin uıymdastyrýdaǵy shyǵyndy óz moınyna aldy.
Búgin marqum bolǵan jas sarbaz jer qoınyna tapsyrylady. Ony aqtyq saparǵa shyǵaryp salýǵa Ómirseriktiń qyzmettesteri, Qorǵanys mınıstrligi men Qurlyq áskerleri áskerı ınstıtýty basshylyǵynyń ókilderi keledi.