Áskerı logıstıka tsıfrlanady: Qarýly kúshterde jańa transformatsııa ortalyǵy iske qosyldy
ASTANA. KAZINFORM - Qazaqstan Respýblıkasy Qarýly kúshteri Tyly bastyǵynyń basqarmasynda tsıfrlyq transformatsııa synyby paıdalanýǵa berildi, dep habarlaıdy QR Qorǵanys mınıstrliginiń baspasóz qyzmeti.
Jańa alań áskerı logıstıka, jabdyqtaý jáne materıaldyq quraldardy esepke alý úderisteriniń tıimdiligin arttyrýǵa baǵyttalǵan zamanaýı tsıfrlyq sheshimderdi ázirleý, talqylaý jáne synaqtan ótkizý ortalyǵy retinde qyzmet atqarady.
Saltanatty ashylý rásimine Qorǵanys mınıstriniń tyl jáne áskerı ınfraqurylym jónindegi orynbasary general-maıor Almaz Jumakeev qatysty.
Óz sózinde ol elimizde jarııalanǵan Tsıfrlandyrý jáne jasandy ıntellekt jyly aıasynda áskerdi qamtamasyz etý júıesine zamanaýı tehnologııalardy keńinen engizý erekshe mańyzǵa ıe ekenin atap ótti.
Onyń aıtýynsha, ıntellektýaldy sheshimderdi qoldaný materıaldyq quraldardy esepke alý men monıtorıng júrgizý úderisteriniń ashyqtyǵyn qamtamasyz etip qana qoımaı, áskerı bólimderdiń qajettilikterine jedel den qoıýǵa múmkindik beredi. Bul óz kezeginde basqarý tıimdiligin arttyryp, materıaldyq-tehnıkalyq qamtamasyz etý júıesiniń sapasyn jańa deńgeıge kóteredi.
Qarýly kúshter Tylynyń bastyǵy polkovnık Arman Mansurov jańa synyp materıaldyq-tehnıkalyq qamtamasyz etý salasyndaǵy ozyq bastamalardy ázirleý men engizýdiń mańyzdy ortalyǵyna aınalatynyn atap ótti. Onyń pikirinshe, bul alań mamandardyń tájirıbe almasýyna, ınnovatsııalyq tásilderdi synaqtan ótkizýine jáne resýrstardy basqarýǵa arnalǵan zamanaýı tsıfrlyq quraldardy ázirleýine qolaıly jaǵdaı jasaıdy.
Іs-shara barysynda qatysýshylar qazirgi kezeńdegi áskerdi qamtamasyz etýdi uıymdastyrýdyń ózekti máselelerin jan-jaqty talqylady.
Atap aıtqanda, ushqyshsyz avıatsııalyq júıeler men robottandyrylǵan keshenderdi damytý, materıaldyq qamtamasyz etý bazalarynyń ınfraqurylymyn jetildirý, áskerı tasymaldardy uıymdastyrý, áskerı qyzmetshilerdi kıim-keshekpen qamtamasyz etý, sondaı-aq tamaqtandyrý nysandary qyzmetkerleriniń arnaıy kıim úlgilerin birizdendirý máselelerine erekshe nazar aýdaryldy.
Kezdesý qorytyndysy boıynsha general-maıor Almaz Jumakeev jazǵy oqý kezeńine arnalǵan basym mindetterdi aıqyndady. Ol basqarý úderisterin odan ári tsıfrlandyrý, qamtamasyz etý júıesiniń tıimdiligin arttyrý jáne jeke quramdy sapaly daıarlaý baǵytyndaǵy jumysty júıeli túrde jalǵastyrý qajettigin atap ótip, aldaǵy kezeńge arnalǵan negizgi mindetter men damý baǵyttaryn belgiledi.
Osyǵan deıin áskerılerdiń tsıfrlyq reıtıngi engiziletini týraly jazdyq.
