Áskerı laýazymdarǵa usyný tártibi: kandıdattardyń tsıfrlyq reıtıngi engizilmek

ASTANA. KAZINFORM — Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine áskerı qyzmetshilerdiń quqyqtyq jaǵdaıyn jetildirý, qorǵanys jáne áskerı qyzmet máseleleri boıynsha ózgerister men tolyqtyrýlar engizý týraly» zań jobasy engizildi. 

— Zań jobasyna Parlament depýtattary bastamashylyq etti. Bul qujattyń maqsaty — memleketimizdiń qorǵanys jáne Qarýly kúshteri salasyndaǵy zańnamany jetildirý. Máselen, joǵary turǵan áskerı laýazymdarǵa usyný úshin kandıdattardyń tsıfrlyq reıtıngin engizý usynylady. Qorǵanys mınıstrliginiń halyqaralyq uıymdar janyndaǵy áskerı ókildikteriniń qyzmetin reglamentteıtin normalar qamtylǵan, — dedi depýtat Aıgúl Quspan Májilistiń jalpy otyrysynda.

Sonymen qatar, zań jobasynda áskerı qyzmetti ótkerý jáne áskerılerdi áleýmettik qamtamasyz etý máselelerin retteıtin birqatar norma usynylǵan.

— Olardyń ishinde Konstıtýtsııalyq sot qabyldaǵan normatıvtik qaýlylardy iske asyrýǵa baǵyttalǵan normalar bar. Májilistiń Halyqaralyq ister, qorǵanys jáne qaýipsizdik komıteti osy zań jobasy boıynsha qorytyndy ázirleýge daıyn, — dedi Aıgúl Quspan.

Aıta keteıik, jaqynda elde áskerı ınstıtýttar men gospıtaldegi jumys barysy tekserildi.