Áskerı qyzmetshilerge turǵyn úıdi jaldaǵany úshin maqsatty ótemaqy tóleý júrgiziledi
Zańǵa sáıkes, jańa jyldan bastap 2013 jylǵy 1 qańtarǵa áskerı qyzmettegi ótili keminde on jyl tolǵan kelisimshart boıynsha áskerı qyzmetshilerge turǵyn úıdi jaldaǵany úshin maqsatty ótemaqy tóleý júrgiziletin bolady.
Jańa ereje boıynsha atalǵan sanattaǵy áskerı qyzmetshiler qyzmettik turǵyn úımen qamtamasyz etiledi nemese olarǵa turǵyn úı jaldaǵanǵa ótemaqy tólenetin bolady, biraq zeınetke shyqqannan keıin qyzmettik turǵyn úıdi jekeshelendire almaıdy. Alaıda, osy sanattaǵy áskerı qyzmetshilerdiń zeınetke shyqqandaǵy járdemaqysynyń mólsheri ósken. Eńbek ótili 20 jylǵa tolǵannan keıin tólenetin járdemaqyńyń mólsheri 20 eselengen eńbekaqyny, 30 jyl eńbek atqarǵandarǵa 30 eselengen eńbekaqyny quramaq. Al buǵan deıingi «Áskerı qyzmetshilerdiń mártebesi jáne otbasy músheleriniń áleýmettik qorǵaý týraly» Zańyna sáıkes zeınetke shyqqandaǵy tólemniń mólsheri qazirgige qaraǵanda on ese az bolatyn. Eńbek ótili 20-dan 25 jylǵa quraǵan áskerı qyzmetshilerge zeınetke shyqqanda nebári alty aılyq eńbekaqy mólsheri tólengen.
2013 jylǵy 1 qańtarǵa áskerı qyzmette kúntizbemen eseptegende on bes jáne odan da kóp jyl bolǵan áskerı qyzmetshiler kúntizbelik esepteýde áskerı qyzmettiń jıyrma jyly ótkennen keıin qyzmettik turǵyn úıdi óteýsiz jekeshelendirýge quqyly. Qyzmettik turǵyn úı óteýsiz, onyń ishinde jabyq jáne oqshaýlanǵan áskerı qalashyqtarda, shekara zastavalarynda jáne komendatýralarda ornalasýy saldarynan jekeshelendirýge jatqyzylmaıtyn jaǵdaılarda óteýsiz jekeshelendirý quqyǵy Qazaqstan Respýblıkasynyń Úkimeti aıqyndaıtyn tártippen tıisti turǵyn úı qunymen óteletindigin aıta ketken jón.
Sonymen birge, 1 qańtardan bastap áskerı qyzmetshilerge jarylý qaýpi bar zattardy jáne ózge de jarylǵysh qurylǵylardy izdeý, tasymaldaý, zalalsyzdandyrý jáne joıý jónindegi jaýyngerlik mindetterdi oryndaǵan kezde táýligine bir aılyq eseptik kórsetkish mólsherinde járdemaqy tólenetin bolady. Tegin tamaqtanýmen qamtamasyz etilý tizimi de keńeıtilgen. Naqtyraq aıtsaq, jaýyngerlik kezekshilikti atqarǵan kezde, qaraýyldaǵy qyzmetti atqarǵan kezde, táýliktik narıadty atqarǵan kezde, dalalyq shyǵýlarǵa (teńizge shyǵýlarǵa) qatysqan kezde, sýasty mindetterin (jumystaryn) oryndaǵan kezde tegin tamaqtanýmen qamtamasyz etiledi. Avıatsııalyq tehnıkaǵa qyzmet kórsetýge jáne ushýlardy qamtamasyz etýge ruqsat etilgen ınjenerlik-tehnıkalyq quram ushýlardy daıyndaý jáne oryndaý kezeńinde tamaqtanýmen qamtamasyz etiledi.