Áskerı qyzmetshilerdiń otbasylary arasynda sporttyq saıys ótti

ASTANA. QazAqparat - Astanadaǵy Qurlyq áskerleri Áskerı ınstıtýtynyń stadıonynda áskerı qyzmetshilerdiń otbasylary arasynda saıys ótti, dep habarlaıdy QazAqparat QR Qorǵanys mınıstrliginiń resmı saıtyna silteme jasap.

Mınıstrlik taratqan málimetterge qaraǵanda, jappaı sport pen salamatty ómir saltyn nasıhattaýǵa baǵyttalǵan shara áskerı qyzmetshilerdiń otbasy múshelerimen jumysty uıymdastyrý jónindegi qyzmet tarapynan uıymdastyryldy.

Іs-sharaǵa ınstıtýttyń qolbasshylyǵy, ofıtserler men kelisimshart boıynsha jumys istep jatqan áskerı qyzmetshiler, professorlyq-oqytýshylar quramy qatysty.

Merekeniń saltanatty ashylýy sap túzeýden, ádilqazylardyń tanystyrylymy men mýzykalyq jattyǵýdan bastaldy. Komandalar ártúrli sport túrinen, onyń ishinde, ústel tennısi, shahmat, doıby, júgirý, mını fýtbol, voleıbol, basketbol jáne arqan tartýdan baq synasty. Saıys qatysýshylaryn merekemen «Sport - bul ómir» mýzykalyq nómirimen «Bolashaq» bı toby quttyqtap keldi.

«Sport berik, myqty, kúshti, qýatty, tózimdi bolýǵa kómektesedi. Qandaı da bir sport túrimen júıeli túrde shuǵyldaný adamdy qalyptastyrýda mańyzdy ról atqarady. Sport únemi biriktiredi, fızıkalyq shydamdylyqtyń deńgeıin arttyrýǵa yqpal etedi. Sportpen shuǵyldanatyn adamda únemi fızıkalyq turǵydan myqty, kúshti erik bolady. Áskerı ınstıtýtta áskerı qyzmetshilerdiń otbasylary úshin únemi osyndaı is-sharalar ótkizilip turady», - dedi ınstıtýt bastyǵynyń tárbıe jáne ıdeologııalyq qyzmet jónindegi orynbasary polkovnık Jumabek Hasenov.

Saıys qorytyndysy boıynsha ınstıtýttyń basqarmasy birinshi oryndy, materıaldyq-tehnıkalyq qamtamasyz etý batalonynyń komandasy ekinshi oryndy jáne jaýyngerlik qamtamasyz etý kafedrasynyń komandasy úshinshi oryndy enshiledi.