Áskerı qyzmetshilerdiń laýazymdyq eńbekaqysy 60 paıyzǵa joǵarylaıdy - Prezıdent
Bul týraly búgin Mańǵystaý oblysyna jumys sapary barysynda «Oımasha» polıgonynda ótken «Otpantaý-2021» shuǵyl-strategııalyq komandalyq-shtabtyq áskerı oqý-jattyǵý jıynyna barǵan Qazaqstan Prezıdenti Qasym-Jomart Toqaev aıtty, dep habarlaıdy QazAqparat.
Memleket basshysy munda áskerı nysannyń qyzmetimen tanysty.
Prezıdent armııanyń memleket pen qoǵam tarapynan jiti baqylanatyn nysan ekenin atap ótti. Sondaı-aq Memleket basshysy áskerdi zamanaýı qarý-jaraqpen jáne tehnıkamen odan ári jabdyqtaýǵa negizdelgen Qarýly Kúshterdi jáne basqa da áskerler men áskerı quramdardy damytý tujyrymdamasynyń bekitilgenin eske saldy.
Joǵarǵy Bas qolbasshy áskerı qyzmetshilerge keshendi áleýmettik qoldaý kórsetý máselelerine de toqtaldy.
– Qarjylandyrý máselesi kezeń-kezeńimen artyp keledi. Bıyldan bastap áskerı qyzmetshilerdiń laýazymdyq eńbekaqylary 35 paıyzǵa ósti. Aldaǵy eki jylda ortasha eseppen 60 paıyzǵa joǵarylaıdy. Barlyq sanattaǵy áskerı qyzmetshiler úshin turǵyn úı máselesi zańnamalyq turǵydan sheshilgen. TMD-nyń basqa elderine qaraǵanda qazaqstandyq áskerdiń áleýmettik toptamasy – básekege qabiletti. Áskerı qyzmetshilerdi áleýmettik qorǵaý máselesi árdaıym memleket basymdyq beretin salalardyń qatarynda bolady. Kúshti ásker – qýatty egemen Qazaqstannyń kepili, – dedi Prezıdent.
