Áskerı qyzmetshilerdiń qaısysyna eń birinshi kezekte jeńildetilgen zaım beriledi

ASTANA. QazAqparat - «Qazaqstannyń turǵyn úı qurylys jınaq banki» AQ jelisi boıynsha áskerı qyzmetshilerge jeńildetilgen zaım beriletini belgili. Al áskerılerdiń ishinde qaısysyna bul zaım birinshi kezekte tapsyrylady? Bul suraqqa OKQ-da ótken baspasóz máslıhatynda atalmysh banktiń Basqarma tóraıymy Lázzat Ibragımova jaýap berdi, dep habarlaıdy QazAqparat tilshisi.

«Osy ýaqytqa deıin áskerı qyzmetshilerge 84 nesıe berdik. Áskerı qyzmetshi alatyn nesıe somasy memleketten beriletin turǵyn úı tólemi negizinde beriledi. Áskerı qyzmetshilerdiń zeınetaqy shottaryna biz qaramaımyz», - deıdi Lázzat Ibragımova.

Onyń aıtýynsha, jyl sońyna deıin 6 myń áskerı qyzmetshige jeńildetilgen zaım berý kózdelip otyr. Al kelesi jyly bul bastama jalǵasyn tabady.

«Kelesi jyly bul baǵdarlamany jalǵastyryp, josparly túrde aldaǵy 5-6 jylda áskerı qyzmetshilerdi úımen qamtyp aıaqtaýdy josparlap otyrmyz. Baǵdarlama boıynsha eń aldymen kópbalaly áskerılerge zaım beriledi. Bizde ótinim bergen 8 balasy bar áskerı qyzmetshi bar. Jalpy, bul uzaqmerzimdi baǵdarlama dep aıtýǵa bolady», - deıdi Lázzat Ibragımova.

Eske sala ketsek, buǵan deıin Lázzat Ibragımova Qazaqstanda 6 myń áskerı qyzmetshige jeńildetilgen zaım beriletinin málim etken edi.