Áskerı qyzmetshiler jolda qalǵan 120 adamdy qutqardy

ASTANA. 23 jeltoqsan. QazAqparat - Qazaqstan armııasynyń áskerı qyzmetshileri Qaraǵandy oblysynda jolda qalǵan 120 adamdy qutqardy. №36352 áskerı bóliminiń qutqarý jasaǵy qarly borannyń qaqpanyna túsken avtokólikterdi alyp shyǵý úshin 4 saǵat boıy jol tazalaýmen aınalysty.

Aýa raıynyń kúrt buzylýyna baılanysty Almaty-Ekaterınbýrg tas joly boıynda Qaraǵandy qalasynan 47 shaqyrym qashyqtyqtaǵy Aqbastaý kentiniń mańynda 12 júk kóligi, 10 jeńil avtokólik, sondaı aq 2 avtobýs jolda qalǵan. Qar úıindileriniń bıiktigi keı jerlerde 2 metrge deıin jetken. Spassktegi oqý-jattyǵý ortalyǵynyń basshylyǵy 2 arnaıy avtokólik pen bir shynjyr tabandy tehnıka bóldi.

Áskerı qyzmetshiler júrgizýshilerdiń Qaraǵandy qalasyna deıin jetip alýyna kómektesti. Qar qushaǵynan qutqarylǵan adamdar qutqarý jasaǵynyń basshysy maıor Leonıd Maklakovqa, sondaı-aq tehnıkamen kómek qolyn sozǵan aǵa serjant N.Toıbekovke, serjant A.Zemlıanýshkın men serjant D.Krotovqa alǵystaryn bildirdi, dep habarlady Qorǵanys mınıstrliginiń baspasóz qyzmetinen.