Áskerı qyzmetshiler Ýfada ótken Eýrazııa oıyndarynda bes medal jeńip aldy

ÝFA. QazAqparat - Bashqurtstan astanasynda jaýyngerlik ónerdiń ІІ Ashyq Eýrazııa oıyndary óz máresine jetti. Onda AOSK-nyń sportshylary 3 altyn jáne 2 kúmis medal enshiledi, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

3 kúnge sozylǵan qyzý saıysta sportshylar qoıan-qoltyq urys, «Qorǵanysh quraldary» barlyq stıldi karate, «Kombat» aralas jáne jaýyngerlik jekpe-jek, belbeýde beldesý, sambo (sporttyq jáne jaýyngerlik), ýshý-taolý, sanda, aıkıdo, thekvondo GTF jáne kendo sııaqty sport túrlerinen kúsh synasty.

Qoıan-qoltyq urystan jarys qorytyndysy boıynsha áskerı sportshylar Jandos Mádıhıanov (55 kg), Mıras Úzdenbekov (75 kg) jáne Ázız Úmbetov (80 kg) altyn medaldardy, Asyl Shońdybaı (60 kg) men Suńǵat Sultanbek (65 kg) kúmis júldeni qanjyǵalaryna baılady.

«Sportshylarymyz keremet nátıje, dene daıyndyǵy men sheberliktiń joǵary deńgeıin kórsetti. Endi bizdi aǵymdaǵy jylǵy mamyrdyń 30-y men maýsymnyń 2-i aralyǵynda Sankt-Peterbor qalasynda ótetin álem chempıonaty kútip tur», - dedi qoıan-qoltyq jekpe-jekten AOSK komandasynyń bastyǵy, maıor M. Bıjanov.

Aýqymdy doda Bashqurtstannyń 100 jyldyǵyna oraılastyryldy. Respýblıkanyń astanasyna Reseıdiń 40 óńiri men shet elderden, ıaǵnı, Armenııa, Ázerbaıjan, Belarýs, Qazaqstan, Latvııa, Tájikstan, Túrkimenstan jáne Ózbekstannan 3 myńǵa tarta qatysýshy jınaldy.