Áskerı qyzmetshiler qar kóshkininen mert bolǵan polktiń komandıri qyzmetinen ketti
ASTANA. QazAqparat - QR Qorǵanys mınıstri Sáken Jasuzaqov Jambyl oblysynda qar kóshkini saldarynan áskerı qyzmetshileri qaza tapqan áskerı polktiń komandıri jáne bólim shtaby bastyǵyn qyzmetterinen bosatty, dep habarlaıdy QazAqparat.
«Qazirgi ýaqytta Qorǵanys mınıstri polk komandıri Biralınov pen bólim shtabynyń bastyǵy Sholbekovti qyzmetinen bosatý týraly sheshim qabyldady», - dedi QR Qorǵanys mınıstriniń orynbasary Talǵat Muhtarov el Úkimeti otyrysynan keıingi baspasóz máslıhatynda.
Onyń aıtýynsha, bul tártiptik sheshim jáne olarǵa qatysty qylmystyq is qozǵalmaıdy.
«Úkimettik komıssııa tarapynan atalǵan oqý-jattyǵý sharalaryn ótkizýdi uıymdastyrýǵa qatysty suraqtar boldy. Sondyqtan Qorǵanys mınıstri atalǵan laýazymdy qyzmetkerlerdi laýazymdarynan bosatý týraly sheshim qabyldady», - dedi Muhtarov.
Eske sala keteıik, aqpannyń 17-si kúni Jambyl oblysy Jýaly aýdanyndaǵy Kóksaı shatqalynda bolǵan qar kóshkini kezinde áskerı daıyndyqtaryn júrgizgen áskerıler qaza tapty. 16 adam qutqarylsa, 7 sarbaz qaıtys boldy. Resmı málimetke sáıkes, qaıtys bolǵan sarbazdardyń otbasylaryna 5 jyldyq aılyq eseptik kórsetkish mólsherinde materıaldyq kómek kórsetiledi.
